“Хитой режасида мантиқ йўқ”. Подоляк Пекиннинг Украинадаги урушни тугатиш бўйича “тинчлик режаси”га муносабат билдирди

Хитойнинг “тинчлик режаси” деб аталувчи ҳужжатида мантиқ йўқ, балки қарама-қаршиликлар сақланиб қолган, деди Украина президенти офиси раҳбари маслаҳатчиси Михаил Подоляк Италиянинг Corriere della Sera газетасига берган интервьюсида айтди.

“Унда (режада) ҳеч қандай тафсилот йўқ, мувозанатли мантиқ йўқ, бандлардан бирида суверенитет ва ҳудудий яхлитлик дахлсизлиги ҳақида гап кетса, бошқасида зудлик билан ўт очишни тўхтатиш зарурлиги ҳақида, яъни босиб олинган ҳудудларни Россия ихтиёрида қолдиришни англатади: бу қарама-қаршилик”, — деб тушунтирди Подоляк.

Подолякнинг сўзларига кўра, тинчлик режасини “босқинчи мамлакат манфаатларига” жавоб берадиган тарзда тузиб бўлмайди, у Россия қўшинларини Украинадан олиб чиқиб кетишдан бошланиши керак.

Украина Хитойнинг Россияга 2022 йил 24 февралдаги чегараларга қадар чекиниш бўйича эҳтимолий таклифини қандай баҳолайди, деган саволга Подоляк шундай деди: “Ўн минглаб одамларнинг ўлими ва ҳудудларни самарали ҳимоя қилишдан сўнг ҳам, бир йил олдин Кремлни бизга ҳужум қилишга ундаган статус-квога қайтишнинг нима кераги бор?”

Подолякнинг таъкидлашича, бунинг иложи йўқ, чунки ҳар қандай муроса тинчликка эмас, балки вазиятнинг кескинлашишига, кейин эса можарога олиб келади.

Хитойнинг “тинчлик режаси”

Украинада уруш бошланганининг бир йиллиги муносабати билан Пекин 12 банддан иборат “тинчлик режаси”ни эълон қилганди. Унда Хитой томони, хусусан, барча давлатларнинг суверенитети ва ҳудудий яхлитлигини ҳурмат қилишни, совуқ уруш менталитетидан воз кечишни, ҳарбий ҳаракатларни тўхтатишни, музокараларни қайта бошлашни ва бир томонлама санкцияларни бекор қилишни таклиф қилган.

Россия Ташқи ишлар вазирлиги “хитойлик дўстларининг Украинадаги можарони тинч йўл билан ҳал қилишга ҳисса қўшишга бўлган самимий истагини” қадрлашини билдирди. Украина президенти Владимир Зеленский Пекин таклифларини тинчлик режаси сифатида кўрмади. “Менимча, Хитой бу борада ўз фикрларини билдирганга ўхшайди, — деди Украина раҳбари. — Хитой можаро ҳақида гапира бошлагани яхши, бошқа савол эса — бу сўзлар ортида нима бор?”

АҚШ президенти Жо Байден Хитойнинг тинчлик режасини фақат Россия учун фойдали деб атади. Германия канцлери Олаф Шольц таклифларда Россия қўшинларини Украинадан олиб чиқиш банди йўқлигига эътибор қаратди.