Агар Киев Россия назорати остига ўтган ҳудудлардан воз кечса, АҚШ президенти Жо Байден беш дақиқада Украинадаги урушга барҳам берган бўлар эди, аммо Киев бундай йўлга рози бўлмайди, деди Владимир Зеленский ABC News телеканалига берган интервьюсида.
Зеленский АҚШда 2024 йил ноябрда бўлиб ўтадиган сайловларда ғалаба қозонса, президентлигининг биринчи кунида урушни тугатишга ваъда берган Дональд Трампнинг баёнотларига шундай муносабат билдирди.
Унинг қўшимча қилишича, Трампда “бир сафар” можарога барҳам бериш имконияти бўлган (Дональд Трамп 2016 йилдан 2020 йилгача АҚШ президенти эди).
“Бир вақтлар Дональд Трампда ўша 24 соат бор эди. Биз уруш ичида эдик, кенг кўламли уруш эмас, лекин урушда эдик, тахминимча, унинг ихтиёрида бу вақт бор эди, лекин у бошқа нарсаларни устувор билган бўлса керак”, — деди Украина президенти.
АҚШда бўлажак сайловлар ва ундан кейин Вашингтоннинг Киевга ёрдами тўхташидан хавотирдамисиз, деган саволга Зеленский бу АҚШнинг ички сиёсий муаммоси эканини айтди. Шу билан бирга, унинг қўшимча қилишича, Киев Америкадаги ҳар иккала партия маъқуллайдиган ёрдамни сақлаб қолишга умид қилмоқда.
Аввал ҳам Зеленский NBC телеканалига берган интервьюсида Дональд Трампнинг Оқ уйга қайтган тақдирда, Украинадаги урушни 24 соат ичида тўхтатиш ҳақидаги ваъдаларига ишонмаслигини айтганди.
Трамп ўтган йилнинг кузида 2024 йилда президентликка номзодини қўйиш ниятини маълум қилганди. Ғалаба қозонган тақдирда у Украинадаги можарони ҳатто, “инаугурациядан олдин” ҳал қилишга ваъда берди. У бир неча бор Москва ва Киев ўртасида тинчлик музокаралари зарурлигини таъкидлаган. Бундан ташқари, сиёсатчи АҚШнинг амалдаги президенти Жо Байденнинг Украинага нисбатан қадамларини танқид қилиб келади: “У тизимли равишда, лекин, эҳтимол, онгсиз равишда бизни учинчи жаҳон урушига олиб бормоқда”.
Изоҳ (0)