AQSH prezidenti Jo Bayden administratsiyasi Ukrainaning 4,65 milliard dollarlik qarzini so‘ndirish niyati haqida Kongressni xabardor qildi. Bu haqda Bloomberg xabar berdi.
Ushbu summa aprel oyida tasdiqlangan 61 milliard dollarlik yordam paketi doirasida taqdim etilgan 9 milliard dollarning yarmini tashkil etadi. Bu mablag‘lar, boshqa yordamlardan farqli o‘laroq, shartli qaytariladigan qarz sifatida berilishi va zarurat tug‘ilganda AQSH prezidenti ushbu summaning 50 foizidan kechishi mo‘ljallangandi.
Davlat departamentiga ko‘ra, qarzni hisobdan chiqarish “Ukraina g‘alaba qozonishiga yordam beradi, Qo‘shma Shtatlar va uning Yevropa ittifoqi, G7+ hamda NATOdagi hamkorlarining milliy manfaatlariga mos keladi”.
Bayden saylangan prezident Donald Tramp Oq uyga kelishidan oldin Ukrainaga iloji boricha ko‘proq yordam bermoqchi. Qarzdan kechish taklifi respublikachilarning e’tiroziga sabab bo‘lmoqda. Jumladan, senator Rend Pol “Bayden ma’muriyatining Ukraina qarzi uchun mas’uliyatni Amerika xalqiga yuklashiga yo‘l qo‘ymaslik uchun Kongressning yuqori palatasida ovoz berishga erishishini aytdi.
Bloomberg ta’kidlashicha, Polning rezolyutsiyasi Kongressning ikkala palatasi tomonidan ma’qullanishi kerak, ammo Senatni demokratlar nazorat qilishini inobatga olsa, bu ehtimoldan yiroq. Bundan tashqari, Jo Bayden hujjatga veto qo‘yishi ham mumkin.
Izoh (0)