58 yoshli “Oskar” mukofoti sovrindori, puerto-rikolik aktyor Benisio Del Toro “Set Mayers bilan kechki shou”da mehmon bo‘lib, Ues Andersonning josuslik komediyasi — “Finikiya sxemasi” ssenariysi tufayli aeroportda qanday ushlab qolinganini aytib berdi.
Men Bostondan Los Anjelesga uchayotgan edim. Nima uchundir qo‘limdagi bagajdan noutbukni olib qo‘ymagan ekanman. Transport xavfsizlik xodimlari sumkamni tekshira boshlashdi, ichidan ssenariyning nusxasi chiqdi, deya hikoya qildi aktyor.
Uning so‘zlariga ko‘ra, ssenariyni o‘qish osonroq bo‘lishi uchun sarlavhalar yirik shrift bilan yozilgan edi.
Ssenariyda juda aniq ko‘rinib turardi: “1-sahna: Samolyot saloni. Bomba”. “2-sahna: Uchuvchilar kabinasi. Uchuvchi katapult qilinadi”. “3-sahna: Halokat”, deya eslaydi Del Toro.
Aeroport xodimlaridan biri bu matnni ko‘rib, hech narsa demay, aktyorga harakatsiz qolishni ishora qilgan va besh nafar xavfsizlik xodimini chaqirgan.
Barchasi oxir-oqibat yaxshilik bilan tugagan. “Trafik” (2000) filmidagi roli uchun “Oskar”ga sazovor bo‘lgan mashhur aktyorni aeroport xodimlari tanib qolgan.
Foto: Screen Rant
Kostyumda, galstuk taqqan boshliq menga bir qaradi, aftidan, meni tanidi, shekilli, ssenariyga ko‘z yugurtirib chiqdi-da, meni qo‘yib yubordi, dedi Del Toro.
Aktyor bu voqeadan xafa bo‘lmagan, aksincha, aeroport xodimlarining hushyorligini yuqori baholagan.
O‘sha yigitning e’tiboridan qoyil qolib, unga bosh barmog‘imni ko‘rsatdim, deya eslaydi u.
“Finikiya sxemasi” filmi butun dunyo bo‘ylab 30-may kuni namoyish etila boshlandi. Ues Andersonning yangi asari Yevropadagi eng boy tadbirkorlardan biri va uning qizi bilan bo‘lgan murakkab munosabatlarga bag‘ishlangan.
Filmda Benisio Del Toro bilan birga Bill Myurrey, Tom Henks, Benedikt Kamberbetch, Skarlett Yoxansson, Brayen Krenston va boshqa mashhur aktyorlar suratga tushgan.
Taniqli tanqidchilar filmni asosan ijobiy kutib olishdi. Rotten Tomatoes saytida 198 ta sharh asosida “Finikiya sxemasi”ning reytingi hozirda 79 foizni tashkil qilmoqda.
Izoh (0)