Dunyodagi eng boy inson Jeff Bezos va Loren Sanchesning nikoh marosimi bo‘lib o‘tishi kutilayotgan 5 hashamatli mehmonxona

Jeff Bezos va Loren Sanches iyun oyining oxirida to‘yini nishonlashadi. Bayram to‘liq 3 kun — 24-iyundan 26-iyungacha o‘tkazilishi rejalashtirilgan. Bu olamshumul voqea Venetsiyada o‘tkaziladi, nikoh San Jorjio Majore orolidagi Avliyo Georgiy cherkovida bo‘lib o‘tadi.

To‘yning miqyosi juda katta bo‘lishi aytilmoqda. Bu haqdagi mish-mishlar mahalliy aholining g‘azabini qo‘zg‘atdi — ular boy mehmonlarning keskin oqimi shaharda harakatlanish bilan bog‘liq muammolarni keltirib chiqarishidan qo‘rqmoqda. Natijada faollar hatto Venetsiya markazida namoyishlar uyushtirishni rejalashtirmoqda.

“Venetsiyada mahalliy aholidan tortib tadbirkorlar, talabalar va oilalargacha bu voqeani muhokama qilmoqda va ayniqsa, hozirda korrupsiya ishi bo‘yicha tergov qilinayotgan mer Luiji Brunyaro boshchiligidagi maʼmuriyatimizga nisbatan norozilik keng tarqalgan. U shaharni o‘zining shaxsiy manfaatlari bilan bog‘liq investorlarga sotdi, endi esa xuddi shunday tarzda uni Bezosga sotmoqda”, deydi namoyishchilardan biri.

Shunga qaramay, Bezos va Sanches dastlabki rejalaridan voz kechmoqchi emas. Juftlikka yaqin manbalarning maʼlum qilishicha, ayni damda ular o‘z to‘yiga 200 ga yaqin kishini taklif qilishgan. Ular orasida Kim Kardashyan, Opra Uinfri, Leonardo Di Kaprio, Orlando Blum va uning rafiqasi Keti Perri, Ivanka Tramp va uning turmush o‘rtog‘i Jared Kushner, shuningdek, AQSH prezidenti va birinchi xonimi Donald va Melaniya Tramplar ham bor.

Vip-mehmonlar bilan ziyofatlar o‘tkazish uchun Jeff Bezos Venetsiyaning eng yaxshi 5 ta mehmonxonasi — The Aman Venice, Danieli, Belmond Hotel Cipriani, St. Regis Venice va Gritti saroyini tanladi. Milliarder o‘z to‘yini qanday interyerlarda nishonlashni rejalashtirayotganini quyida ko‘rishingiz mumkin.

Aman Canal Grand mehmonxonasi

Bezos ijaraga olgan birinchi joy — Aman Venice mehmonxonasi. U XVI asrda saqlanib qolgan Venetsiya saroylaridan birida joylashgan. So‘nggi Uyg‘onish davri uslubidagi mahobatli bino shaharning asosiy diqqatga sazovor joylaridan biri bo‘lgan Grand kanalida qad rostlagan.

Uning interyeri ko‘p jihatdan palatssoning asl ko‘rinishini saqlab qolgan. Mehmonxonaning ichkarisi naqshlar, marmar zinapoyalar va yog‘och shiftlar bilan bezatilgan.

Mehmonxona saytida aytilishicha, yilning issiq mavsumida kechki ovqat va ziyofatlar uchun Venetsiyaning markaziy qismidagi kamdan kam uchraydigan xususiy yashil hududlardan biri — kanal bo‘yidagi bog‘dan foydalaniladi.

Bezos va Sanchesning mehmonlari uchun palatsso zallari va Arva restorani ham mavjud bo‘lib, u yerda mavsumiy menyu asosida taomlar tortiladi. Kechki ovqatni asosiy zalda ham, alohida shaxsiy xonalarda ham tashkil etish mumkin bo‘ladi.

Bundan tashqari, mehmonxona vakillarining taʼkidlashicha, Aman Veniceʼning butun hududi sayyohlar oqimidan izolyatsiya qilingan va yuqori darajadagi maxfiylikni taʼminlaydi, demak, kelin-kuyov va uning do‘stlarini tantana paytida begonalar bezovta qilmaydi.

Danieli

Danieli mehmonxonasi San Marko maydoni yaqinida joylashgan. U Jeff Bezos to‘yi uchun bron qilgan mehmonxonalar orasida eng kattasi bo‘lib, u yer bir vaqtning o‘zida uchta tarixiy binoni egallaydi. Asosiysi — XIV asrda Venetsiya dojlari oilasiga tegishli bo‘lgan Dandolo saroyidir. Qolgan ikki bino XIX va XX asrlarda qurilgan bo‘lib, yagona mehmonxona majmuasiga birlashtirilgan.

Mehmonxona xonalari Venetsiya gotikasi va barokko uslubida bezatilgan bo‘lib, uning ichida asl zinapoyalar, vitrajlar va antiqa buyumlar to‘plamlari saqlanib qolingan.

Tadbirlar uchun ko‘rfazga qaragan panoramali ko‘rinishga ega Terrazza Danieli restorani, shuningdek, saroyning ichki zallari mavjud — ehtimol, Sanches va Bezos o‘zlarining to‘y kechasini aynan shu joylardan birida o‘tkazishadi.

Shuningdek, mehmonxona hududidan bandargohga to‘g‘ridan to‘g‘ri chiqish yo‘li mavjud bo‘lib, u yerdan suv taksisi yoki gondolada shahar bo‘ylab sayohat qilish mumkin.

Belmond Cipriani

Bezosning uchinchi to‘y mehmonxonasi Belmond Cipriani Judekka orolida joylashgan. U mehmonlarga Venetsiyaning tarixiy markazi — dojlar saroyi va San Jorjo Majore oroli bo‘ylab 270 darajali ko‘rinishni taqdim etadi.

Ushbu mehmonxonaning asosiy xususiyati shundaki, u yerda shaharda ochiq osmon ostida joylashgan yagona olimpiya basseyni mavjud. Belmond Hotel Cipriani saytida aytilishicha, uning hajmi baxtli tasodifdir. Majmuani yaratishda quruvchilar fut va metrlarni chalkashtirib yuborishgan, natijada ular aql bovar qilmaydigan darajada ulkan basseyn qurishgan.

Aytgancha, basseyn atrofi tadbirlar o‘tkaziladigan joy sifatida ishlatiladi — bu ziyofatni o‘tkazish uchun zarur bo‘lgan narsa.

Bundan tashqari, mehmonxonada bir nechta restoranlar mavjud bo‘lib, ulardan biri Mishlen yulduzi bilan ajralib turadi. Shuningdek, Bezos va Sanchesning mehmonlari ixtiyorida xususiy pristan, tennis korti, sog‘lomlashtirish markazi, bolalar klubi va Venetsiya ko‘rfazining chekka hududlari bo‘ylab ekskursiya dasturlari bo‘ladi.

Gritti saroyi

Jeff Bezosning tanlovida Gritti saroyi ham bor. Dastlab u taniqli Venetsiya zodagonlaridan biri Piza oilasiga tegishli bo‘lgan va keyinchalik doj Andrea Grittining mulkiga o‘tgan. XIX asrda saroy mehmonxonaga aylantirilgan.

Gritti saroyi yopiq tadbirlar uchun bir nechta joylarni taklif qiladi. Ular orasida kanalga, Santa Mariya Della Salyut cherkoviga va laguna orollariga qaragan 250 metr kvadrat maydonli Redentore lyuks terrasasi eng nufuzli hisoblanadi.

Bundan tashqari, mehmonxonada Gritti terrasasi va saroy ichidagi tarixiy zallar mavjud bo‘lib, u yerda ziyofatlar, furshetlar va xususiy tushliklar o‘tkaziladi. Mehmonxonadan kichik to‘ylar, taqdimotlar o‘tkazish uchun faol foydalaniladi, Venetsiya kinofestivali paytida esa unda A-list (Gollivudda A-list deb ataladigan aktyorlar ro‘yxati mavjud. Unda superyulduz maqomiga egaligi hech kimda shubha uyg‘otmaydigan kino sanoati vakillari bor. Leonardo Di Kaprio va Bred Pitt, Margo Robbi va Emma Stoun shular jumlasidandir) yulduzlari to‘xtaydi.

St. Regis

Jeff Bezos ijaraga olgan eng so‘nggi mehmonxona St. Regis Veniceʼdir. U shahar markazida, Grand kanali bo‘yida joylashgan. Tarixiy arxitekturasiga qaramay, ichkarida mehmonlarni zamonaviy dizayn kutmoqda.

Mehmonxonaning asosiy maydonlaridan biri mashhur Ginori 1735 chinni uyi bilan hamkorlikda bezatilgan Ginori terrasasi hisoblanadi. Saytda aytilishicha, u ochiq havoda o‘tkaziladigan tadbirlar va hatto kichik konsertlar uchun ham mos. Shuningdek, mehmonxona binosidan Santa Mariya Della Salyut bazilikasi, Akademiya ko‘prigi va ko‘rfazning to‘g‘ridan to‘g‘ri ko‘rinishi mavjud.

Bundan tashqari, St. Regis zamonaviy sanʼat kolleksiyasi bilan mashhur — unda Jaume Plens, Lorenzo Quinn va boshqa rassomlarning asarlarini ko‘rish mumkin.