Turk seriallari keng tarqalgan stereotiplarga zid ravishda ko‘p qirrali va qiziqarli. Ular har doim ham faqat murakkab sevgi sarguzashtlaridan iborat emas, balki hayotiy, samimiy va ko‘ngillarni junbishga keltiradigan voqealarni ham o‘z ichiga oladi. Ushbu seriallarda har bir tomoshabin o‘ziga mos mavzuni topishi mumkin. Maqolada e’tiborga loyiq turk seriallari bilan tanishasiz.
1. “G‘aroyib shifokor” (2019)
“Kinopoisk” saytidagi reytingi — 8,7.
Ali yetimlikda ulg‘aygan. Bolalar uyida tarbiyalangan, keyin tibbiyot universitetiga o‘qishga kirib, muvaffaqiyatli tamomlagan. U mohir jarroh bo‘lishni orzu qiladi, biroq bemorlar unga ishonchsizlik bilan qaraydi, hamkasblari esa dastlab shubha qilgan bo‘lsalar-da, uning iste’dodiga qoyil qolishadi. Gap shundaki, Ali savant sindromiga ega: bu autizm spektridagi buzilish bo‘lib, ayrim hollarda noodatiy aql-zakovat bilan namoyon bo‘ladi. Ali esa kasallikni chuqur tahlil qilish qobiliyati bilan ajralib turadi.
Bosh rollarda: Taner Olmez, Onur Tuna, Sinem Unsal va boshqalar.
Tomoshabinlar bu serialni yuqori baholab, eng yaxshi tibbiy drama sifatida e’tirof etishdi. Xuddi shu syujet asosida Janubiy Koreya doramasi hamda amerikalik “Yaxshi doktor” seriali suratga olingan bo‘lsa-da, ko‘pchilik fikricha, turkcha versiyasi eng ta’sirli va samimiy chiqqan.
“Nikoh haqida barcha haqiqatlar” (2021)
“Kinopoisk” saytidagi reytingi — 8,5.
Muvaffaqiyatli yurist va advokat Azra. U onasi Cholpan boshchiligida opa-singillari bilan birga ishlaydi. Cholpan ajrashgan, Azraning eri va farzandlari bor, Gunesh esa kelin bo‘lish arafasida, Sanem esa nikohga mutlaqo qarshi. Ularning mijozlari shaharning boy va nufuzli odamlari. Bir kuni Cholpan ishni Azraga topshirishga qaror qiladi. Muammolar va sinovlar esa birin-ketin boshlanadi: er bilan jiddiy muammolar yuzaga keladi, Cholpan qizining bunday mas’uliyatga tayyor emasligini anglaydi, Azra esa xafagarchilik tufayli raqib firmaga ishlashga ketadi. Biroq muammolar shu bilan tugamaydi, aksincha, endi boshlanadi...
Bosh rollarda: Gokche Bahadir, Sumru Yavrujuk, Bertan Asllani va boshqalar.
Tomoshabinlar har bir seriyada voqealar rivoji tez rivojlanishini alohida ta’kidlab, hikoyani hayotiy va qiziqarli deb baholashdi. Lekin serial oxirlarida, tomoshabinlar fikricha, syujet biroz sustlashadi. Ayrim qahramonlarning taqdiri esa umuman yakunlanmay, loyihadan olib tashlandi.
“Hayot qo‘shig‘i” (2016)
“Kinopoisk” saytidagi reytingi — 8,1.
Bayram va Salih bolalikdan dushman bo‘lgan. Ular bir qishloqda ulg‘aygan, lekin hech qachon bir-birlarini tushunolmagan. Shuning uchun bir paytlar kelajakda o‘z farzandlarini turmushga chiqarib, dushmanlikni tugatishga qaror qilgan. Vaqt o‘tishi bilan ikkisi ham o‘z biznesini ochishga harakat qilgan, biroq faqat Bayram muvaffaqiyatga erishib, oilasini Istanbulga ko‘chirib, hurmatga sazovor insonga aylangan. Salih esa qishloqda qizlari bilan qolib, raqobatchisi darajasiga yetolmagan. Endi bir necha avval berilgan va’dani bajarish vaqti keldi. Lekin ularning farzandlari — Melek va Keriman — umuman boshqa hayotga, qiziqishlarga va sevgi hikoyalariga ega. Yoshlar esa kelishilgan nikohga qarshi birlashishga qaror qilishdi. Biroq uning o‘rnini egallashga tayyor bo‘lgan Huliya bor — u bolalikdan Bayramning o‘g‘liga oshiq.
Bosh rollarda: Birkan Sokullu, Burju Birijik, Tayanch Ayaydin va boshqalar.
Tomoshabinlar aktyorlarning ajoyib ijrosi, qiziqarli syujet va bosh qahramonning murakkab xarakteriga yuqori baho bergan. Shu bilan birga operatorlik ishlaridagi kamchiliklar, shoshilinch yakun va ba’zi qahramonlarning noaniq harakatlari haqida tanqidlar ham bo‘ldi. Serialni murakkab, bahsli obrazlarni ko‘rmoqchi bo‘lganlarga tavsiya qilishadi.
“Qog‘oz uy” (2021)
Kinopoisk saytidagi reytingi — 7,5.
Jinoiy huquq professori Jihan Firtina har tomonlama muvaffaqiyatli va baxtli inson hisoblanadi. Uning mehribon rafiqasi Aylin shaharda tanilgan advokat. Ularning uch nafar — 19 yoshli Mert, 16 yoshli Jemra va 7 yoshli Melisa ismli farzandlari bor. Juftlikning ajoyib uyi va oilasi, orzu qilinadigan barcha narsalari bor. Biroq, bir lahzadagi zaiflik erkakning oldida turgan hamma narsani oilasidan tortib obro‘sigacha buzib yuboradi.
Bosh rollarda: Erdal Beshikchiolu, Nur Fettaho‘g‘lu, Tuvana Turkay va boshqalar.
Serial qiziqarli syujetga ega bo‘lsa-da, tomoshabinlarda ko‘plab savollar paydo bo‘ldi. Ayniqsa, qahramonlarning xatti-harakatlari ularning professional darajasi bilan mutlaqo mos kelmasligi tanqidlarga sabab bo‘lgan. Masalan, psixologning aqlli emas, balki kinoyali, mayda-chuyda odam sifatida ko‘rsatilishi yoki jinoiy huquq professori o‘z sirini ehtiyotsizligi sabab ochib qo‘yishi serialning kamchiliklari sifatida ko‘rsatiladi. Shunga qaramay, har bir epizodning chuqur axloqiy ma’noga ega, bu esa tomoshabin e’tiboriga loyiq jihatdir.
“Ilk va so‘ngi” (2021)
Kinopoisk saytidagi reytingi — 7,4.
Deniz va Barish taqdir taqozosi bilan uchrashib, bir-birlarini shunchalik kuchli sevib qolishdiki, bir-biridan ayro yashashni tasavvur ham qila olmadilar. Yoshlar his-tuyg‘ularining abadiy davom etishiga ishonishardi. Ammo hayot va nikoh hamma narsani o‘z o‘rniga qo‘yadi va yoshlarni yettinchi osmondan yerga tushirib qo‘yadi. Er-xotin ko‘p janjallashib, yig‘ilib qolgan g‘azab va tushunmovchiliklar paydo bo‘ladi. Serialda juftlikning munosabatlari boshlanishi va o‘n yil o‘tib ajrashishlari tasvirlanadi hamda o‘zaro da’volar, sevgi va umidsizlikning qarama-qarshiligi ko‘rsatiladi.
Bosh rollarda: O‘zge Ozpirinchi, Salih Bademchi, Gulchin Kultur Shahin va boshqalar.
Tomoshabinlar fikricha, bu serial o‘z shaxsiy hayoti haqida o‘ylayotganlar uchun yaxshi psixoterapiya bo‘lishi mumkin. Uni tomosha qilgach, sevgi abadiyligiga ishonish yoki qahramonlarga hamdardlik bildirish istagi tug‘iladi. Biroq ko‘pchilikka syujetning cho‘zilganligi yoqmadi, chunki uning g‘oyasi to‘liq metrajli filmga ham sig‘ar edi.
“Rahm-shafqat” (2013)
Kinopoisk saytidagi reytingi — 7,3.
Narin Egey dengiz sohilidagi kichik shaharchada ulg‘aydi. Uning bolaligi og‘riq, zo‘ravonlik va qashshoqlikdan iborat edi. Ammo bu qizning ruhiyatini sindirmay, aksincha, xarakterini mustahkamlab, qiyinchiliklarga jasorat bilan qarashga o‘rgatdi. U yuristlik fakultetini tamomlab, yaxshi karyera qura oldi. 18 yoshida shovqinli megapolisga ko‘chib o‘tib, boy oiladan bo‘lgan Deniz ismli qiz bilan tanishdi. Ijtimoiy mavqe va butunlay qarama-qarshi hayotiy tajribalar ularga eng yaqin do‘st bo‘lishga to‘sqinlik qilmadi. Ammo bu do‘stlikni Denizning Shveysariyadan qaytgan ukasi Irmak buzishi mumkin edi. U ayollar orasidagi iliq munosabatlarni tushunmay, “nomaqbul” do‘stlikka barham berishga qaror qildi.
Bosh rollarda: O‘zgu Namal, Burchin Terzio‘g‘lu, Ahmet Rifat Shungar va boshqalar.
Tomoshabinlar serialni janrga xos an’anaviy elementlar va kutilmagan burilishlar ham mavjudligiga qaramay turk seriallari uchun noyob syujetga ega deb topishdi. Serial muvaffaqiyatining asosiy omillari — murakkab syujet, sevimli va taniqli aktyorlarning a’lo darajadagi ijrosi, o‘tgan va hozirgi voqealarning o‘zaro bog‘lanishi edi.
“Bu qiz” (2022)
Zeynep — oddiy oiladan chiqqan, qiyin taqdirga ega oddiy qiz. U o‘zini va besh yoshdagi bolakay aqliga ega 45 yoshli otasini ta’minlash uchun klining kompaniyasida ishlashga majbur. Bir kuni Zeynep internetning yangi yulduzi O‘zanning uyini tozalash imkoniyatiga ega bo‘ladi.
Bosh rollarda: Erkan Petekkaya, Sezin Akbasho‘g‘ullari, Munire Apaydin va boshqalar.
Serialda xiyonat, sevgi uchburchagi, qayg‘u va ko‘z yoshlar tilga olinadi. Lekin aktyorlar o‘z rollarini shunchalik jonli va samimiy ijro etishdiki, tomoshabinlarning qalbida chuqur iz qoldirdi. Shuningdek, turk seriallari muxlislari syujetning jadalligi va chiroyli saundtreklarni ham yuqori baholashdi. Biroq, ba’zi tomoshabinlar ikki soatga cho‘zilgan intrigalardan charchaganliklarini bildirishdi.
Izoh (0)