HBO (Home box office) kompaniyasi “Garri Potter” asariga asoslangan yangi serialda Drako Malfoy va uning otasi Lyutsius rollarini ijro etadigan aktyorlarni tanladi.
Rasmiy press-relizda keltirilishicha, Drako rolini yosh aktyor Loks Pratt gavdalantiradi, Lyutsius Malfoyni esa britaniyalik aktyor va musiqachi Jonni Flinn o‘ynaydi. Flinn ilgari “Emma” (2020) komedik dramasi hamda Entoni Hopkins ishtirokidagi “Yagona hayot” filmidagi rollari bilan tanilgan.
Shuningdek, Xogvartsdagi ba’zi o‘quvchilarni kimlar ijro etishi ham ma’lum bo‘ldi. Sheymas Finnigan rolida — Leo Erli, Parvati Patil rolida — Alessiya Leoni, Lavanda Braun obrazida esa Sienna Musa namoyon bo‘ladi.
Variety nashri xabariga ko‘ra, serialdagi Dursley oilasi a’zolari Vernon va Petuniya rollarini Bel Pauli va Deniyel Rigbi ijro etadi. Biroq ularning o‘g‘li Dadli obrazini kim o‘ynashi hozircha noma’lum.
Avvalroq HBO asosiy uchlik — Garri, Germiona va Ron rollarini ijro etadigan aktyorlar ismini oshkor etgandi. Garri Potter rolini 11 yoshli Dominik MakLoklin, Germiona Greynjer rolini 11 yoshli Arabella Stenton, Ron Uizli obrazini esa 12 yoshli Alaster Staut gavdalantiradi.
Yosh sehrgarning sarguzashtlari haqidagi filmning asosiy rollariga nomzodlarni qidirish uchun mualliflar ochiq kasting o‘tkazgan, unda 30 mingdan ortiq nomzod ishtirok etgan.
Serial suratga olinishi haqida ilk bor 2023-yil aprel oyida Warner Bros. va HBO tomonidan e’lon qilingan. Mazkur televizion loyiha J.K. Rouling qalamiga mansub mashhur “Garri Potter” romanlar seriyasiga asoslangan bo‘lib, har bir mavsumda kitoblarning bir qismi yoritilishi rejalashtirilgan. Birinchi fasl 2027-yilda namoyish etilishi kutilmoqda. Umuman olganda, serial yetti fasldan iborat bo‘ladi.
Izoh (0)