Hozirgi kunda Gollivud yosh iste’dodlar bilan to‘lib-toshgan. Anya Teylor-Joy, Jenna Ortega, Zendaya, Timoti Shalame va Ostin Batler kabi yosh yulduzlarning ko‘pchiligi hali 30 yoshga ham yetmagan. Biroq jahon kinematografiyasi faqat yoshlarni emas, balki tajribali iste’dodlarni ham qadrlamoqda.
Semyuel L. Jekson
Rejissyor Kventin Tarantinoning sevimli aktyori Samuel L. Jekson 1994-yilda “Jinoiy asar” filmida Juls Uinnfild rolini o‘ynab, hayotida burilish yasadi. O‘sha paytda aktyor 46 yoshda edi. U bundan oldin Martin Skorsezening “Yaxshi yigitlar” va Stiven Spilbergning “Yura davri parki” filmlarida suratga tushgan bo‘lsa-da, rollari epizodik edi.
“Jinoiy asar”dan so‘ng Samuel Leroy Jekson haqiqiy shuhratga erishdi. Keyingi bir necha o‘n yil davomida u “Manfur sakkizlik”, “Kingsman: maxfiy xizmat”, “Qasoskorlar”, “Ozod Jango”, “Yulduzlar urushi” kabi o‘nlab katta byudjetli filmlarda rol ijro etdi. Hozirda u dunyodagi eng ko‘p haq oladigan aktyorlardan biri hisoblanadi.
Alan Rikman
Britaniyalik aktyor Alan Rikman Garri Potter haqidagi birinchi film ekranlarga chiqqandan so‘ng keng tomoshabinlar orasida tanildi. “Garri Potter va hikmatlar toshi” 2001-yilda, Rikman 55 yoshga to‘lganida namoyish etildi.
Bunga qadar u “Robin Gud: o‘g‘rilar shahzodasi”, “Dogma” va “Galaktika bo‘ylab avtostop” kabi filmlarda suratga tushgan bo‘lsa-da, jahon shuhratidan ancha yiroq edi. Alan Rikman o‘zining birinchi rolini — “Chaqilmas yong‘oq” jangari filmidagi jinoyatchi rolini 42 yoshida ijro etgan. Undan oldin u dizayner sifatida faoliyat yuritgan va hatto do‘stlari bilan birgalikda Soxoda dizayn studiyasini ochgan.
Tommi Li Jons
Texaslik aktyor Tommi Li Jonsga shuhrat 48 yoshida keldi. U rejissyor Endryu Devis suratga olgan “Qochoq” detektiv trillerida eng yaxshi ikkinchi darajali erkak rol uchun “Oskar” mukofotini qo‘lga kiritdi. Bunga qadar Jons kinolarda, hatto bosh rollarda ham suratga tushgan bo‘lsa-da, uning nomi Gollivudda hech narsani anglatmas edi.
1994-yildan so‘ng aktyorning kariyerasi tezlashdi. U “Qora libosli odamlar”, “Quvg‘in” va boshqa bir qator filmlarda rol ijro etdi. “Qora libosli odamlar” filmidagi Agent K roli Tommi Li Jonsga chinakam shuhrat va hamkasblari e’tirofini keltirdi.
Keti Beyts
Melodrama ixlosmandlari aktrisa Keti Beytsni, shubhasiz, rejissyor Jeyms Kemeronning “Titanik” filmidagi ijrosi orqali tanishsa, yozuvchi Stiven King muxlislari esa uni “Mizeri” romanining ekran talqini orqali bilishadi. Aynan shu rol unga birinchi “Oskar” mukofotini va shuhratni keltirdi, garchi o‘sha paytda Beyts xonim 43 yoshda bo‘lgan bo‘lsa-da.
Keti Beyts faoliyati davomida 30 dan ortiq filmda suratga tushgan. Ularning eng mashhurlari — “Dolores Kleyborn”, “Titanik”, “Parijdagi yarim tun” va “P.S. Men seni sevaman” filmlaridir.
Piter Dinkleyj
Axondroplaziya kasalligiga chalingan iste’dodli aktyor Piter Dinkleyj 1990-yillarning oxiridan boshlab kinolarda rol ijro etib kelmoqda. Uning filmografiyasiga “Lessi” oilaviy filmi, “Penelopa” fantastik melodramasi, boshqa komediya va seriallar kiradi. Dinkleyjga birinchi marta 2003-yilda “Vokzal nazoratchisi” dramasi ekranlarga chiqqandan so‘ng e’tibor qaratildi. Bu ish tomoshabinlarni Dinkleyjga ikkinchi darajali kulgili personaj sifatida emas, balki to‘laqonli dramatik aktyor sifatida qarashga undadi.
Bu film uning uchun o‘ziga xos “tramplin” vazifasini o‘tadi — bir necha yildan so‘ng uni mashhur “Taxtlar o‘yini” serialida suratga tushishga taklif qilishdi. O‘sha paytda Piter Dinkleyj 42 yoshda edi.
Oktaviya Spenser
Oktaviya Spenser rejissyor Teyt Teylorning “Xizmatkor” dramasida Minni Jekson rolini ijro etishi uchun 15 yil kutishiga to‘g‘ri keldi. Aktrisa 1996-yildan beri seriallarda rol o‘ynab kelayotgan edi.
2002-yilda Spenser Sem Reymining “O‘rgimchak odam” jangovar filmida kichik rol o‘ynadi, biroq bu uning shuhrat qozonishiga sabab bo‘lmadi. 2011-yilda “Xizmatkor” filmi ekranlarga chiqqach, 41 yoshli Oktaviya Spenser AQSH kino aktyorlari gildiyasi mukofoti, “Oskar”, BAFTA va “Oltin globus” mukofotlarini qo‘lga kiritishga muvaffaq bo‘ldi,
Izoh (0)