Ko‘plab tomoshabinlar sevimli turk seriallari qahramonlarini yaxshi ko‘ribgina qolmasdan, balki ularning fe’l-atvori, xatti-harakatlari, uslubi va tashqi ko‘rinishini o‘zlashtirishga harakat qiladi. Quyida e’tiborga mashhur turk seriallaridagi ayrim qahramonlarning qiyofalari va xarakterlarini eslab o‘tamiz.
Reyyan — “Beqaror”
Reyyan — bulutlarda suzib yuruvchi va abadiy muhabbatga ishonuvchi qiz. Ajablanarlisi shundaki, oilasida uni jazolashlariga, nafratlanishlariga va qarindoshlari orasida o‘zini begona his qilishiga qaramay, u pok va beg‘ubor bo‘lib qoladi. U orzu qilgan erkinlikni faqat uydan qochgan paytlaridagina his etardi. Aynan qasosga mukkasidan ketgan Miran unda shunday muhabbatni uyg‘ota oldiki, bu tuyg‘u tez orada Reyyanni og‘ir tanlov oldiga qo‘yishi muqarrar edi.
Bosh rolni tengsiz Ebru Shahin ijro etgan. U tabiatni juda yaxshi ko‘radi, qizning bolaligidan adabiyotdan tortib yengil atletikagacha ko‘plab qiziqishlari bo‘lgan. Muhabbatga munosabati qahramoni bilan o‘xshash: Ebru buyuk sevgi, ezgu quvvat, uyg‘unlik va samimiylikka ishonadi. U yaqinlarining har bir daqiqadagi mehri va iliqligini qadrlay oladigan mas’uliyatli farzand bo‘lib voyaga yetgan. Hozir basketbolchi Jedi Usmonga turmushga chiqqanidan keyin ham, hayotning har bir lahzasidan zavq olishda davom etmoqda.
Seyran Korxan — “Qo‘rg‘on sirlari”
Seyran — zolim otaning qizi bo‘lib, u oilasini tezroq tark etish, ta’lim olish va karyera qurish orzusida yashaydi. U turmush qurishni o‘ylamaydi, ammo otasi uning taqdirini allaqachon hal qilgan. Maqsadga intiluvchan va o‘z qadr-qimmatini biladigan qiz eri Feritning badavlat xonadonidagi fitnalar girdobiga tushib qoladi. Vaqt o‘tishi bilan Seyran o‘zgaradi, biroq uning o‘zini hech qanday vaziyat sindira olmaydi.
Aktrisa Afra Sarachog‘lu — qat’iyatli, romantik qiz bo‘lib, erta ulg‘ayishga va orzu qilish o‘rniga o‘z oldiga maqsadlar qo‘yib, ularga intilishni o‘rganishga majbur bo‘lgan. U tungi klubdagi shovqinli dam olish o‘rniga do‘stlari bilan osoyishta suhbatlashish mumkin bo‘lgan sokin joylarni ma’qul ko‘radi. Hayotda ham u muhabbat va munosabatlarni ikkinchi o‘ringa qo‘yib, o‘z karyerasiga e’tibor qaratadi. Aktyor Mert Ramazan Demir bilan to‘yi haqidagi barcha mish-mishlarga u hech qanday izoh bermaydi, aksincha hayotdan zavqlanib, sermashaqqat mehnatini davom ettiradi.
Eda — “Qalbim eshigini qoq”
Eda quvnoq, g‘ayratli va bilimga chanqoq qiz. Uni xolasi tarbiyalagan bo‘lib, qizchani mehr bilan o‘rab-chirmab, unga o‘simliklarga muhabbat uyg‘otgan. U suhbatdoshining zaif nuqtalaridan foydalanib, o‘z maqsadlariga erishish uchun his-tuyg‘ularini namoyon etishni biladi. U ko‘p qirrali va hissiyotga boy qahramon bo‘lib, tomoshabinlar xotirasida chuqur iz qoldirgan hamda uning yaxshi yoki yomonligi haqida bahslarga sabab bo‘lgan.
Hande Erchel, shubhasiz, jonli va murakkab qahramonni yarata oldi. Haqiqiy inson mutlaqo yaxshi ham, butunlay yomon ham bo‘lmaydi. Hayotda ham u xuddi shunday: hissiyotlarga beriluvchan, o‘ziga ishongan, qaysar. Shu bilan birga, Hande chin yurakdan sevishni va do‘st tutinishni uddalaydi: eng og‘ir damlarida yaqinlarini qo‘llab-quvvatlaydi. Oilasiga juda sodiq.
Nihon — “Sevgi iztirobi”
Nihon sevmagan odami bilan zaharli munosabatda qolishga majbur bo‘lgan va Kamoldan najot kutayotgan baxtsiz qiz. Ko‘p juftliklar bir-birini sevib emas, balki o‘z maqsadlarini ko‘zlagan ota-onalarining ko‘rsatmasi bilan birga yashaydi. Psixologlar Nihonning xatti-harakatlarini “majburiy ojizlik sindromi” deb atashdi. Ammo aslida u zaif inson emas, balki o‘ziga ishongan, hissiyotli va tez ta’sirlanuvchi shaxs.
Aktrisa Neslihan Atagul hamkasbi Qodir Dog‘uluga turmushga chiqdi. Muxlislar Neslihan erkak ayolni ruhan ezib qo‘ygan murakkab munosabatlarga tushib qolgan deb o‘ylashadi. Go‘yo u erini yagona yaqin inson deb biladi, hatto o‘z onasidan ham uzoqlashib ketgan emish. Ular 2025-yilda ota-ona bo‘lishdi. Shu bilan birga, u juda sabrli, samimiy, dono va oilasiga mehr bilan munosabatda bo‘ladi.
Bala — “Hukmdor Usmon”
Bala juda bosiq ayol, o‘zini tuta biladi, lekin shu bilan birga qalbida haqiqiy bo‘ron kechayotgan bo‘lishi mumkin. U aqlli, hamdard, adolatparvar, uning mehri nafaqat qabila bolalariga, balki butun dunyo yetimlariga ham yetadigandek. U haqiqatga astoydil ishonadi, adolat uchun kurashishga tayyor, va shubhasiz, bunga doim erishadi — chunki Bala tabiatan va fiziologik jihatdan haqiqiy jangchi.
Bala rolini ajoyib tarzda ijro etgan aktrisa O‘zge Torer ham xuddi shunday mehribon, kamtarin va bosiq qiz. “Hukmdor Usmon” serialidagi rolidan so‘ng, ko‘plab qizlar muxlislar xotirasida kuchli va mustaqil ayol sifatida qolgan bosh qahramonning xatti-harakatlaridan o‘rnak ola boshladi. O‘zgening butun dunyoga bo‘lgan cheksiz muhabbati uning shaxsan shug‘ullanadigan va atrofdagilarni ham jalb qiladigan faol xayriya faoliyatida namoyon bo‘ladi.
Zaynab — “Chegarasiz muhabbat”
Dovyurak, halol va mehribon qiz muxlislarning qalbini zabt etgan. Zaynab nopok ishlar bilan shug‘ullanadigan oilasidan uzoqda, Amerikaga borib ta’lim olgan. Biroq bosh qahramon Xalil bilan uchrashgach, uning butun hayoti o‘zgarib ketadi va Zaynab beixtiyor xavfli voqealar girdobiga tortiladi.
Zaynab rolini gavdalantirgan yosh aktrisa Miray Daner tomoshabinlar va prodyuserlar orasida shuhrat qozongan. Uni mehribon, samimiy, muloqotga usta va hazilkash qiz sifatida ta’riflashadi. U omma nimani yoqtirishini juda yaxshi bilsa-da, bu unda manmanlikni uyg‘otmagan, aksincha u odamlarga quvonch ulashishdan baxt topadi. Bundan tashqari, tomoshabinlarning mehri uni aktyorlik mahoratini yanada oshirishga undaydi.
Nare Albora — “Olis shahar”
Nare — Alborlar oilasining mehribon qizi. U doimo boshqalarning istagini o‘zinikidan ustun qo‘yadi, faqat Shahin yonidagina his-tuyg‘ularini namoyon etadi. U juda kuchli, chuqur fikrlovchi va sezgir. Uzoq vaqt davomida Nare sevgan insoniga umr yo‘ldosh bo‘lish nasib etmasligiga ishongan. Biroq Shahinning qat’iyati tufayli ular baribir turmush qurishadi.
Aktrisa Sahra Shash o‘z qahramonini katta zavq bilan ijro etdi. U Narening hayotini yashash hissiy jihatdan mushkul bo‘lganini tan oladi. Sahra o‘zi sevmagan insonga turmushga chiqmasligiga ishonchi komil, ammo ayni paytda Narening sabablarini tushunadi. Shash hayotda bunday vaziyatga duch kelmaganini aytadi: Nare va Shahin o‘rtasidagi munosabat ekran chegaralaridan haqiqiy hayotga o‘tgani haqida uzoq vaqtdan beri mish-mishlar tarqalgan. Biroq Sahra Alper Chankaya bilan munosabatda ekanligini inkor etadi.
Izoh (0)