Hindistonning Haydarobod shahrida joylashgan Harvesting Robotics nomli texnologik startap retriver zotli itni ishga oldi. Hozirda oltin tusli kuchukcha “baxt direktori” lavozimida faoliyat yuritmoqda. Bu haqda The Indian Express nashri xabar berdi.
Tadqiqotlarga ko‘ra, ish joyida hayvonlarning mavjudligi xodimlarning stress darajasini kamaytirishga yordam beradi, ijtimoiy munosabatlarni yaxshilaydi va hatto ish samaradorlikni oshiradi. Nashr ta’kidlaganidek, Amazon va Google kabi ko‘plab kompaniyalar bu amaliyotni uzoq vaqtdan beri qo‘llab kelmoqda. Harvesting Robotics ham to‘rtoyoq xodimni ishga olib, ko‘plab ijtimoiy tarmoqlar foydalanuvchilarining e’tiborini qozondi.
“Yangi xodimimiz — Denver bilan tanishing, u baxt direktori. U bizga o‘xshab kodlash bilan shug‘ullanmaydi, robot ishlariga ahamiyat bermaydi. Kuchuk shunchaki yonimizda bo‘lgani uchun kayfiyatimizni ko‘taradi va xodimlarni energiya bilan to‘ldiradi”, deb yozadi LinkedIn’da startap asoschisi Rahul Arepaka.
“Ha, biz rasmiy ravishda hayvonlarga do‘stona munosabatdagi kompaniyaga aylandik va fikrimcha, bu eng yaxshi qaror. Aytgancha, Denver kompaniyada beriladigan eng yaxshi bonuslarga ega”, deya qo‘shib o‘tdi Arepaka.
Ushbu post LinkedIn’da mashhur bo‘lib ketdi va 16 mingdan ortiq layk yig‘di.
“Bugun men ko‘rgan eng zo‘r kontent bo‘ldi”, deb foydalanuvchilardan biri izoh qoldirdi. “Yangi g‘oyalar, yangi fikrlash usuli. Omad tilayman”, deya fikrini bildirdi boshqalar.
Human Animal Bond Research Institute (Inson va hayvonlar o‘rtasidagi bog‘liqlikni o‘rganish instituti) tomonidan o‘tkazilgan tadqiqot shuni ko‘rsatdiki, hayvonlar uchun qulay muhitga ega tashkilotlarda ishlaydigan xodimlarning 87 foizi kompaniyada qolishga tayyorroq, 91 foizi esa ishga yanada ko‘proq qiziqish uyg‘onganini his qiladi.
Izoh (0)