Britaniyalik ko‘cha rassomi Benksi navbatdagi graffiti suratini taqdim etdi. U o‘zining yangi asarini Instagram sahifasida e’lon qildi.
Suratda devorga chizilgan qora mayoq tasvirlangan. Graffiti oldidagi trotuarda joylashgan ustunning soyasi mayoq poydevori bilan vizual uyg‘unlashib, o‘ziga xos illyuziya hosil qilgan. Unda:
“Siz menda nimani ko‘rayotgan bo‘lsangiz, ana shunday bo‘lishni istayman” (“I want to be what you see in me”) degan yozuv ham mavjud.
Benksi surat joylashgan manzilni aniq ko‘rsatmagan bo‘lsa-da, ijtimoiy tarmoq foydalanuvchilari bu joy Fransiyaning Marsel shahri, aniqrog‘i san’at muhiti, tor ko‘chalari va ko‘plab graffitilari bilan mashhur Le Panye (Le Panier) tumani ekanligini aytishmoqda.
Benksi 1990-yillardan buyon faoliyat yuritayotgan anonim ingliz street-art (ko‘cha san’ati) rassomi, siyosiy faol shaxs va rejissyordir. Uning asl ismi va kelib chiqishi noma’lum bo‘lib, shaxsi haqida ko‘plab bahs-munozaralar mavjud.
Benksi o‘zining satirik ko‘cha san’ati va trafaret uslubida ishlangan suratlari orqali xalqaro miqyosda e’tirof qozongan. Uning asarlari ko‘pincha qora hazil bilan boyitilgan bo‘lib, ular zamonaviy jamiyatning ijtimoiy va siyosiy muammolariga keskin izohlar beruvchi qisqa iboralar bilan boyitiladi.
Izoh (0)