Buyuk Britaniya hukumati La-Mansh orqali noqonuniy migratsiyaga qarshi kurashish uchun qo‘shimcha 132 million dollar ajratmoqda. Bu haqda Guardian gazetasi mamlakat Ichki ishlar vazirligiga tayanib xabar bermoqda.
“Vazirlar La-Mansh orqali o‘tishlarni to‘xtatish choralari, jumladan, Fransiya bilan migrantlar almashinuvi to‘g‘risidagi kelishuv doirasida qo‘shimcha 100 million funt sterling (taxminan 132 million dollar) sarflaydi”, deya yozadi nashr.
Ma’lumotlarga ko‘ra, mablag‘lar Jinoyatchilikka qarshi kurashish milliy agentligining qo‘shimcha 300 nafar xodimiga ish haqi to‘lashga, shuningdek, muhojirlarni Buyuk Britaniyaga noqonuniy tashishni tashkil etuvchi jinoiy guruhlar haqida ma’lumot to‘plashni kuchaytirish uchun yangi uskunalar va texnologiyalarga yo‘naltiriladi.
Ilgari Britaniya hukumati 2025-yil boshidan beri La-Mansh bo‘g‘ozi orqali Buyuk Britaniya qirg‘oqlariga 25 mingdan ortiq noqonuniy muhojir yetib kelganini ma’lum qilgan edi. Bu iyul oyi oxirigacha bo‘lgan davrda rekord ko‘rsatkich hisoblanadi.
Noqonuniy muhojirlar ko‘pincha Buyuk Britaniyaga kirib, moliyaviy nafaqa va ijtimoiy dasturlarga kirish imkonini beruvchi qochqin maqomini olish uchun har qanday imkoniyatni izlaydilar. 2024-yilda Buyuk Britaniyaga La-Mansh bo‘g‘ozi orqali qayiqlarda 36,8 mingdan ortiq noqonuniy shaxs kelgan, bu o‘tgan yilga nisbatan chorak barobar ko‘pdir. Rekord ko‘rsatkich 2022-yilda qayd etilgan, o‘shanda Britaniya qirg‘oqlariga 45,7 mingdan ortiq muhojir yetib kelgan. Buyuk Britaniya hukumati boshpana so‘raganlarni mehmonxonalarga joylashtirish uchun kuniga bir necha million funt sterling sarflamoqda.
Iyul oyida Buyuk Britaniya hukumati noqonuniy odam kontrabandasida qatnashgan shaxslarga nisbatan yangi sanksiyalar rejimi joriy etilishini ma’lum qilgandi.
Izoh (0)