Xitoyda bir ayol aeroportdagi yuzni aniqlash tizimi tomonidan tanilmagani sababli makiyajini o‘chirishga majbur qilindi. Bu haqda Oddity Central xabar berdi.
O‘tgan hafta Xitoy ijtimoiy tarmoqlarida tarqalgan qisqa videoda aeroport xodimlari ayolga yuzidagi makiyajni nam salfetka yordamida artishni talab qilayotgani aks etgan. Videoda ko‘rsatilishicha, ayol shaxsiy guvohnomasidagi fotosuratga o‘xshash ko‘rinishga kelguncha makiyajini tozalashi kerakligi aytilgan.
Video o‘tgan yilning sentyabr oyida Shanxay aeroportida suratga olingan, ammo yaqindagina ijtimoiy tarmoqlarda odamlarning e’tiborini tortgan. Videoda kamerani ushlab turgan shaxs (ehtimol aeroport rasmiysi) ayol makiyajini butunlay artib, shaxsiy guvohnomasidagi suratga o‘xshashini talab qilmoqda.
Videoda aeroport xodimi yo‘lovchi ayolga shunday baqirgan.
Pasport fotosuratiday ko‘rinmaguncha hammasini artib tashla, nega shunday makiyaj qilasan? O‘zingga muammo so‘rayapsan?, deydi u.
Ayol oxir-oqibat aeroportning yuzni aniqlash tekshiruvidan o‘tgan-o‘tmagani aniq emas, ammo uning boshidan kechirganlari ijtimoiy tarmoqlarda kulgili sharhlarga sabab bo‘ldi.
Ba’zilar yosh ayolga achinib, u allaqachon juda uyatchan ko‘rinayotganini aytishdi va aeroport rasmiysining makiyaj haqida doimiy gapirishiga hojat yo‘qligini ta’kidlashdi. Boshqalar esa zamonaviy yuzni aniqlash skanerlariga makiyaj qanchalik muammo bo‘lishi mumkinligi haqida savol qo‘yishdi.
“Makiyaj qanchalik qalin bo‘lmasin, yuzni tanib bo‘lmasligi mumkin emas-ku? Ehtimol, uskuna yangilanishi kerakdir”, degan fikrlar ham bildirildi.
Bundan ancha avval ham bir necha xitoylik ayollar Janubiy Koreyaga yuz jarrohligi uchun uchib borganida yuzlari juda o‘zgargani sababli mamlakatga kirishda muammoga duch kelishgan.
Izoh (0)