Ukraina rahbari Vladimir Zelenskiy AQSH prezidenti Donald Tramp bilan bo‘lgan telefon suhbati haqida ma’lum qildi. Ukraina prezidenti bu suhbatni “juda muhim va foydali” deb atadi.
Zelenskiyning so‘zlariga ko‘ra, u Tramp bilan AQSH hamda Ukraina o‘rtasida mudofaa sohasida hamkorlik imkoniyatlarini, shuningdek, o‘zaro xaridlar va investitsiya masalalarini ham muhokama qilgan.
“Bugun biz Rossiyaning Ukrainaga havo hujumlari va frontdagi holat haqida gaplashdik. Prezident Tramp vaziyatdan juda yaxshi xabardor, unga Ukrainaga bo‘lgan e’tibori uchun minnatdorlik bildiraman. Shuningdek, AQSH yetakchisi bilan Ukrainaning havo hujumidan mudofaa imkoniyatlarini muhokama qildik va osmonimizni yanada yaxshiroq himoya qilish ustida birga ishlashga kelishib oldik. Shu bilan birga, jamoalarimiz o‘rtasida navbatdagi uchrashuvni o‘tkazish bo‘yicha ham kelishdik”, deb yozdi Ukraina yetakchisi Telegramʼdagi o‘z sahifasida.
So‘nggi oylarda Ukraina AQSH va boshqa G‘arbdagi ittifoqchilaridan Rossiyaning tobora kuchayib borayotgan raketa zarbalaridan himoyalanish uchun qo‘shimcha havo mudofaa imkoniyatlarini so‘ramoqda.
Boshqa manbalardan biriga ko‘ra, Tramp Zelenskiyga Qo‘shma Shtatlardan Ukrainaga qanday qurollar yetkazib berish to‘xtatilganini tekshirib ko‘rishini aytgan.
Boshqa narsalar qatorida, Kiyevga qo‘shimcha Amerika Patriot qurilmalari (ular ballistik raketalarni tutib olishga qodir — tahr.), shuningdek, raketalar zarur.
Axios jurnalisti Barak Ravid o‘z manbalariga tayanib Trampning Zelenskiy bilan muloqoti taxminan 40 daqiqa davom etganini ma’lum qildi.
Uning manbasiga ko‘ra, Tramp Zelenskiyga havo hujumidan mudofaa sohasida yordam bermoqchi ekanligini aytgan va agar biror narsa to‘xtatilgan bo‘lsa, aniq nima ekanligini tekshirib ko‘radi.
Avvalroq Pentagon Kiyevga zenit-raketalar va boshqa aniq boshqariladigan o‘q-dorilar yetkazib berishni to‘xtatib qo‘ygan edi.
Izoh (0)