11-aprel kuni Germaniyadagi Ramshteyn bazasida Ukraina ittifoqchilarining mazkur formatidagi 27-yig‘ilishi bo‘lib o‘tdi. Unda Yevropaning qator davlatlari Kiyevga yangi harbiy yordam paketlarini e’lon qildi. Shuningdek, Ukraina armiyasini elektron urush tizimlari bilan ta’minlash bo‘yicha yangi koalitsiya tuzildi. Unga Berlin rahbarlik qiladi.
Yig‘ilish avvalida Vladimir Zelenskiy so‘zga chiqib, ittifoqchilariga minnatdorchilik bildirdi. Ukraina prezidenti, shu bilan birga, Patriot havo mudofaa tizimlari uchun ehtiyoj yuqoriligini ta’kidladi.
“Ukraina shaharlarini ballistik raketalardan aynan Patriot himoya qila oladi. Rossiya aynan shu yo‘l orqali tinch aholini nishonga olmoqda”, dedi Zelenskiy.
Shu kuni Yevropaning qator davlatlari Ukrainaga harbiy yordam paketlarini e’lon qildi. Jumladan, Germaniya joriy yilda 4 ta IRIS-T havo mudofaa kompleksi va mazkur tizimlar uchun 300 ta zenit raketa yetkazib beradi. Berlin, shuningdek, 30 ta Patriot raketasi, 15 ta Leopard 1 tanki, 25 ta Marder piyoda jangovar mashinasi va qo‘shimcha ravishda 100 000 artilleriya snaryadi yuboradi.
Buyuk Britaniya esa 450 million funt sterling miqdorida yordam ajratadi. U yuz minglab dronlar, radar tizimlari xaridi va ilgari yetkazilgan texnikalarni ta’mirlash uchun ishlatiladi. London tomonidan e’lon qilingan yordam paketini moliyalashtirish uchun Norvegiya 100 million funt sterling beradi. Bundan tashqari, o‘q-dorilar va havo mudofaasi tizimlari uchun 1 milliard yevro ajratadi. Umuman olganda, Kopengagen tomonidan 2025-yilda Ukraina uchun 5 milliard yevrolik harbiy yordam dasturi amalga oshiriladi.
Belgiya 1 milliard yevro, Daniya esa 900 million yevrolik harbiy yordam paketlarini e’lon qildi. Litva esa o‘q-dori sotib olish uchun 20 million yevro ajratishni rejalashtirmoqda. Estoniya bo‘lsa Ukraina qurolli kuchlariga 10 000 artilleriya snaryadi, shuningdek, quruq taomlar yetkazib beradi.
Izoh (0)