Rossiya Tashqi ishlar vazirligi Sevastopolga raketa hujumi munosabati bilan AQSH elchisi Lin Treysini chaqirtirdi. Unga “Vashingtonning qilmishlari jazosiz qolmasligi” va’da qilingan.
Rossiya TIV taʼkidlashicha, AQSH “Qrimdagi terakt uchun Kiyev rejimi bilan birdek javob beradi”. AQSH Kiyevning Rossiya hududiga zarbalarini rag‘batlantirgani uchun Rossiya javob choralarini ko‘radi, deya ta’kidladi TIV.
“Rossiyaga qarshi gibrid urush olib borayotgan va aslida mojaro tarafiga aylangan Qo‘shma Shtatlar Ukraina Qurolli kuchlarini eng zamonaviy qurol-yarog‘lar, jumladan, Rossiya aholisiga qarshi ishlatiladigan kassetali ATACMS raketalari bilan taʼminlayotgani taʼkidlanadi. Nishon olish va uchish missiyalarini amerikalik harbiy mutaxassislar amalga oshirayotgani tufayli ular bu jinoyat uchun Kiyev rejimi bilan teng javobgarlikka tortiladi”, — deyiladi Rossiya TIV bayonotida.
Kecha, 23-iyun kuni Sevastopolga kassetali kallaklar bilan jihozlangan beshta Amerika ATACMS raketasi hujum qilgani Rossiya tomonidan xabar berildi.
“Raketa hujumini qaytarish paytida Rossiya havo mudofaasi to‘rtta raketani tutib oldi. Beshinchi raketaning parchalangan jangovar kallagi Sevastopoldagi plyaj ustida portladi. Oxirgi maʼlumotlarga ko‘ra, 153 kishi turli darajadagi tan jarohatlari olgan. To‘rt kishi vafot etgan", — deyiladi Rossiya Mudofaa vazirligi xabarida.
Kreml matbuot kotibi Dmitriy Peskov ushbu zarbani sharhlar ekan, Vladimir Putinning yaqinda Rossiya “texnologik jihatdan murakkab raketalarni” kim boshqarayotganini biladi, degan so‘nggi bayonotini esga oldi.
“Bular ukrainaliklar emas. Siz OAV vakillari sifatida Yevropadagi, ayniqsa, Vashingtondagi hamkasblarim, matbuot kotiblari bilan bog‘lanib, ulardan nima uchun ularning hukumati rus bolalarini o‘ldirayotganini so‘rang”, — dedi Peskov.
Izoh (0)