Украина раҳбари Владимир Зеленский АҚШ президенти Дональд Трамп билан бўлган телефон суҳбати ҳақида маълум қилди. Украина президенти бу суҳбатни “жуда муҳим ва фойдали” деб атади.
Зеленскийнинг сўзларига кўра, у Трамп билан АҚШ ҳамда Украина ўртасида мудофаа соҳасида ҳамкорлик имкониятларини, шунингдек, ўзаро харидлар ва инвестиция масалаларини ҳам муҳокама қилган.
“Бугун биз Россиянинг Украинага ҳаво ҳужумлари ва фронтдаги ҳолат ҳақида гаплашдик. Президент Трамп вазиятдан жуда яхши хабардор, унга Украинага бўлган эътибори учун миннатдорлик билдираман. Шунингдек, АҚШ етакчиси билан Украинанинг ҳаво ҳужумидан мудофаа имкониятларини муҳокама қилдик ва осмонимизни янада яхшироқ ҳимоя қилиш устида бирга ишлашга келишиб олдик. Шу билан бирга, жамоаларимиз ўртасида навбатдаги учрашувни ўтказиш бўйича ҳам келишдик”, деб ёзди Украина етакчиси Telegramъдаги ўз саҳифасида.
Сўнгги ойларда Украина АҚШ ва бошқа Ғарбдаги иттифоқчиларидан Россиянинг тобора кучайиб бораётган ракета зарбаларидан ҳимояланиш учун қўшимча ҳаво мудофаа имкониятларини сўрамоқда.
Бошқа манбалардан бирига кўра, Трамп Зеленскийга Қўшма Штатлардан Украинага қандай қуроллар етказиб бериш тўхтатилганини текшириб кўришини айтган.
Бошқа нарсалар қаторида, Киевга қўшимча Америка Патриот қурилмалари (улар баллистик ракеталарни тутиб олишга қодир — таҳр.), шунингдек, ракеталар зарур.
Axios журналисти Барак Равид ўз манбаларига таяниб Трампнинг Зеленский билан мулоқоти тахминан 40 дақиқа давом этганини маълум қилди.
Унинг манбасига кўра, Трамп Зеленскийга ҳаво ҳужумидан мудофаа соҳасида ёрдам бермоқчи эканлигини айтган ва агар бирор нарса тўхтатилган бўлса, аниқ нима эканлигини текшириб кўради.
Аввалроқ Пентагон Киевга зенит-ракеталар ва бошқа аниқ бошқариладиган ўқ-дорилар етказиб беришни тўхтатиб қўйган эди.
Изоҳ (0)