AQSH yordamisiz Kiyevning o‘q-dorilari yoz oxirigacha yetadi, shundan so‘ng vaziyat keskinlashib, inqirozli tus oladi. Bu haqda Germaniyaning Bild gazetasi harbiy ekspert Karlo Masalaga tayanib xabar bermoqda.
“Ukrainaning o‘q-dori zaxiralari yoz oxirigacha yetadi”, deya ta’kidlanadi nashrda.
Ekspertning fikricha, Ukraina uchun barcha qurol-yarog‘ yetkazib berish hal qiluvchi ahamiyatga ega. Uning so‘zlariga ko‘ra, Yevropa bu kamchilikni to‘ldirishga urinmaguncha, o‘q-dorilarning jiddiy tanqisligi yuzaga kelishi mumkin.
Bild’ning qo‘shimcha qilishicha, Ukraina qurolli kuchlari (UQK) uchun Patriot havo hujumidan mudofaa tizimlari uchun raketalar, shuningdek, GMLRS raketalarini yetkazib berishning to‘xtatilishi ayniqsa jiddiy masala hisoblanadi. Bularsiz HIMARS reaktiv tizimlari deyarli befoyda bo‘lib qoladi.
1-iyul kuni Politico gazetasi manbalarga asoslanib, AQSH o‘z zaxiralari tugagani sababli Ukrainaga havo hujumidan mudofaa tizimlari uchun zenit raketalarini, shuningdek, ba’zi yuqori aniqlikdagi o‘q-dorilar va artilleriya snaryadlarini yetkazib berishni to‘xtatganini xabar qildi.
Washington Post gazetasining yozishicha, Ukrainaning bir qator amaldorlari Qo‘shma Shtatlarning bu qarori ularni kutilmaganda hayratga solgan.
Izoh (0)