Qrimda ikki erkak “Ukraina razvedkasi manfaatlari yo‘lida” harbiy texnikani surat va videoga olishda gumonlanib, hibsga olindi. Ular davlatga xiyonatda ayblanmoqda.
“Rossiya Federal xavfsizlik xizmati Qrim hududida Ukraina maxsus xizmatlari manfaatlarini ko‘zlab mintaqadagi muhim infratuzilma obyektlari va harbiy texnikalarni suratga va videoga olgan, 1977 va 1993-yillarda tug‘ilgan ikki nafar Rossiya fuqarosini hibsga oldi”, deyiladi FXX Jamoat xavfsizligi markazi bayonotida.
Ma’lumotlarga ko‘ra, qo‘lga olinganlar Ukraina xavfsizlik xizmati tomonidan Telegram messenjeri orqali yollangan.
“Qrimliklar o‘z kuratorlarining ko‘rsatmalari bo‘yicha suratga olingan materiallarni keyinchalik xorijiy razvedka manfaatlari yo‘lida foydalanish uchun Ukraina Telegram botiga yuborgan”, deya da’vo qilingan.
Holat yuzasidan Rossiya Jinoyat kodeksining 275-moddasi (davlatga xiyonat) bo‘yicha jinoiy ish qo‘zg‘atilgan. Hibsga olinganlar tergov qilinayotgani va aybiga iqrorlik xulosalari olinayotgani aytilmoqda. Ushbu modda bo‘yicha jazo 20 yilgacha ozodlikdan mahrum qilishni nazarda tutadi.
“Internetda provokatsiyalarga yo‘l qo‘ymaslik uchun Rossiya fuqarolarini hushyor bo‘lishga va iloji bo‘lsa, Telegram va WhatsApp orqali notanish kontaktlar bilan aloqa qilmaslikka chaqiramiz”, deyiladi xavfsizlik xizmati bayonotida.
Izoh (0)