Yevropa Ittifoqining tashqi ishlar bo‘yicha oliy vakili Josep Borrel Ukrainadagi urushning natijasi shu yilning bahor va yozida hal bo‘lishini aytdi. Bu haqda BBC xabar berdi.
Borrel shu sababli Ukraina AQSHning yangi harbiy yordam ajratishini uzoq kuta olmasligini aytdi.
“Nima bo‘lishidan qat’i nazar, tezda bajarilishi kerak. Keyingi oylar hal qiluvchi bo‘ladi. Ko‘pchilik tahlilchilar Rossiyaning joriy yozda yirik hujumini kutmoqda va Ukraina AQSHdagi navbatdagi saylov natijalarini kuta olmaydi”, — dedi u.
Yevroittifoq diplomatiyasi rahbari Yevropa ham Ukrainaga harbiy yordamni tezlashtirishi kerakligini aytdi.
“Qo‘llab-quvvatlashimizni kuchaytirishimiz kerak. Shuning uchun sanoat mudofaa salohiyatimizni oshirmoqdamiz”, — deya qo‘shimcha qildi Josep Borrel.
AQSH Ukrainaga 300 million dollarlik yangi harbiy yordam paketini yuborishini ma’lum qildi.
“Ushbu paket yordamning 55-transhi bo‘lib, 300 million dollargacha baholanmoqda. U Ukrainaning havo mudofaasi, artilleriya va tankka qarshi qurollarga bo‘lgan ehtiyojlarini o‘z ichiga oladi”, — deyiladi Pentagon saytida.
Paketga Stinger MANPADS, HIMARS raketa tizimlari uchun o‘q-dorilar, 155 mm artilleriya snaryadlari, shu jumladan, yuqori portlovchi, ikki tomonlama takomillashtirilgan kassetali o‘q-dorilar (DPICM), 105 mm snaryadlar va AT4 tankka qarshi granata otish moslamalari kiradi.
Ukrainada urush boshlangandan beri AQSH, Mudofaa vazirligining hisobotida ko‘rsatilganidek, Kiyevga 44,2 milliard dollar yubordi. Ikki yil ichida Ukrainaga Patriot havo mudofaa tizimi, 2 mingdan ortiq Stinger MANPADS, 12 NASAMS, 31 Abrams tanklari va 45 T-72B tanklari, 20 Mi-17 vertolyotlari va boshqalar berildi.
2023-yil oktyabr oyidan beri Kongress Ukrainaga moliyaviy yordam ko‘rsatish loyihasini muhokama qilmoqda. Dastlab Ukraina (60,06 milliard dollar), Isroil (14,1 milliard dollar) va Tayvanni (4,83 milliard dollar) qo‘llab-quvvatlash uchun 118 milliard dollar ajratish, shuningdek, AQSH chegaralarini mustahkamlash choralari (20,23 milliard dollar) ko‘zda tutilgan.
Fevral o‘rtalarida Senat Ukraina, Isroil va Tayvanga 95 milliard dollarlik yordam ajratadigan hujjatni ma’qulladi. Vakillar palatasi hali bu tashabbusni ko‘rib chiqmagan.
Izoh (0)