Polsha politsiyasi pul undirish maqsadida migrantlarni o‘g‘irlashda gumon qilingan xalqaro guruhni fosh qildi. To‘da tarkibidagi to‘rt nafar ukrainalik qo‘lga olindi. Bu haqda Polshaning RMF FM nashri xabar berdi.
Xalqaro jinoiy to‘da Polsha va Latviya hududida faoliyat yuritgan. Jinoyatchilar odamlarni o‘g‘irlab, chegaradan noqonuniy ravishda olib o‘tgan va ularning oilalaridan pul talab qilgan.
Qo‘lga olinganlar to‘rt nafar Ukraina fuqarosi bo‘lib, ular Polshada qonuniy ravishda bo‘lgan. Ularning eng kattasi 40 yoshda, eng kichigi esa 20 yoshda. Iyun oyi o‘rtalarida Polsha Markaziy tergov byurosi Efiopiyaning ikki fuqarosi o‘g‘irlab ketilgani haqida ma’lumot olgan. Gumanitar tashkilotlardan birining vakillari internet orqali shunday xabar olganini aytgan.
Ingliz tilida yozilgan xabarga ko‘ra, Polshada kriptovalyutalar talab qilayotgan to‘da tomonidan odamlar o‘g‘irlangan. Jinoyatchilar qurbonlarni o‘ldirish va ularning a’zolarini sotish bilan tahdid qilgan. Xabarda yalang‘och bog‘langan erkaklarning fotosuratlari bo‘lgan.
Latviyada esa to‘da a’zolari uch malilikni o‘g‘irlab ketgani aniqlangan. Erkaklarni bog‘lab, yukxonaga qamab qo‘yishgan. Ulardan birini daraxtga bog‘lab, yog‘och tayoq bilan qattiq kaltaklashgan. Qiynoq videosi uning oilasiga pul to‘lash talabi bilan yuborilgan.
Polsha politsiyasi shov-shuvli ishni tekshirish uchun Latviya, Litva va Estoniya xizmatlari bilan hamkorlikni yo‘lga qo‘ygan. O‘g‘rilarning shaxsi aniqlangan. Iyun oyi oxirida o‘g‘rilar to‘dasidan uch kishini Polshada qo‘lga olishga muvaffaq bo‘lgan. Jinoiy to‘daning ayrim aʼzolari hali ham ozodlikda yuribdi.
Izoh (0)