Rossiya hukumati 4 ta hududga dron hujumlari uyushtirilgani haqida ma’lum qildi. Bu haqda “Ukrainskaya Pravda” xabar berdi.
Hujumlar Lipetsk viloyatining Lipetsk va Yelets shaharlarida sodir bo‘lgan. Lipetskda harbiy aerodrom, Yeletsda esa akkumulyator zavodi joylashgan. Lipetsk viloyati gubernatori Igor Artamonov hodisani shunday izohladi:
“Dron hujumi oqibatida Yeletsdagi korxonalardan birining avtoturargohida yong‘in chiqqan. Hozirda yong‘inga barham berilgan. Yaqin atrofdagi korxona xodimlari evakuatsiya qilingan. Dastlabki ma’lumotlarga ko‘ra, qurbonlar va jabrlanganlar yo‘q”.
Gubernator aynan qaysi korxona nazarda tutilayotganiga aniqlik kiritmagan. Biroq dron hujumlari sodir bo‘layotgani haqidagi ma’lumot turli hududlardan kelayotgani aytilgan.
Artamonovga ko‘ra, dronning bo‘laklari Lipetskdagi xususiy turar joy binosiga qulagan. Oqibatda bir kishi halok bo‘lgan, yana 2 kishi jarohatlangan. Shuningdek, yana bir dron Yeletsda qurilayotgan ko‘p qavatli uyga qulab tushgan.
Ta’kidlanishicha, dronlar Yeletsdagi akkumulyator, dron, shuningdek, aviatsiya va dengiz floti uchun akkumulyatorlar ishlab chiqaradigan “Energiya” OAJ zavodiga hujum qilgan. Bu zavodga 23-mayga o‘tar kechasi ham hujum qilingan edi. Lipetskda Rossiyaning harbiy aerodromi joylashgan bo‘lib, hududda Su-34, Su-35 va MiG-31 samolyotlari joylashgan. Unga 2024-yil avgust oyida ham zarba berilgandi.
Dron hujumi haqida Voronej gubernatori Aleksandr Gusev ham ma’lum qilgan. Unga ko‘ra, Voronej shahrida urib tushirilgan dron qismlarining qulashi oqibatida uyning tomi shikastlangan, elektr tarmog‘i uzilgani sabab bir qishloq elektr ta’minotisiz qolgan.
Rossiya Mudofaa vazirligi 3-iyul kuni ertalab havo hujumidan mudofaa tizimlari “69 ta Ukraina dronini” yo‘q qilgani haqida xabar bergan. Xususan, Belgorod viloyati ustida 27 ta, Voronejda 22 ta, Lipetskda 10 ta, Rossiyaning Kursk viloyati ustida 8 ta va Qrimda 2 ta uchuvchisiz uchish apparati urib tushirilgan.
Izoh (0)