Prezident Shavkat Mirziyoyev 1-iyul kuni raqamli texnologiyalar, sunʼiy intellekt va telekommunikatsiya sohalaridagi rejalar taqdimoti bilan tanishdi. Bu haqda Prezident matbuot xizmati xabar berdi.
Mamlakatda raqamli texnologiyalar rivoji uchun yaratilgan keng imkoniyatlar katta natijalar olib keldi. IT-park rezidentlari 2 800 dan oshdi, xorijiy kompaniyalar 752 taga yetdi. Bu sohada 40 ming nafar yoshlar yuqori daromad topyapti.
Oxirgi 5 yilda soha eksporti 170 million dollardan 1 milliard dollarga yaqinlashdi. Internet tezligi 7 barobar, mobil internet esa 4,5 barobar oshdi. O‘tgan yili sohadagi startaplarga 70 million dollar venchur investitsiya kiritildi.
Bularning natijasida “Global startaplar indeksi” reytingida O‘zbekiston 12 pog‘ona yuqorilab, Top-100 talikka kirdi. O‘tgan yili “Sunʼiy intellektga tayyorlik” xalqaro indeksida O‘zbekiston 17 pog‘ona ko‘tarilib, Markaziy Osiyoda 1-o‘rinni egalladi. O‘zbekiston telekommunikatsiya sohasining o‘sish surʼatlari bo‘yicha MDH mamlakatlari reytingida birinchi o‘rinni egalladi.
Bunday ishlar izchil davom ettirilmoqda. Xususan, kelgusi yilda davlat xizmatlarini raqamlashtirishni 70 foizga, IT xizmatlari miqdorini 100 trillion so‘mga yetkazish rejalashtirilgan. “Elektron hukumat rivojlanish indeksi”da kamida 55-o‘ringa ko‘tarilish maqsad qilingan. Bu ko‘rsatkichlarga erishish uchun qator hujjat loyihalari ishlab chiqilgan.
Taqdimotda ushbu loyihalar va takliflar muhokama qilindi.
Bugungi kunda 760 ta davlat xizmati raqamlashtirilgan. O‘tgan yili 10 million fuqaro raqamli xizmatlardan foydalangan.
Davlat rahbari endi keyingi “Raqamli hukumat” bosqichiga o‘tish vaqti kelganini taʼkidladi. Buni, eng avvalo, aholi eng ko‘p murojaat qiladigan taʼlim, tibbiyot, qurilish va kommunal sohalardan boshlash kerakligi aytildi.
O‘zbekiston prezidentining 2024-yil 14-oktyabrdagi qaroriga muvofiq, Sunʼiy intellekt texnologiyalarini 2030-yilga qadar rivojlantirish strategiyasi qabul qilingan edi. Bu sohada infratuzilmani yaxshilashga 50 million dollar ajratildi. Sunʼiy intellekt milliy modelini yaratib, 1 million nafar mutaxassis tayyorlash vazifasi belgilangan.
Raqamli texnologiyalar vaziri buni amalga oshirish bosqichlari, infratuzilmani yaxshilash tadbirlari haqida axborot berdi.
Sohada xizmatlar hajmi va eksportini oshirish ham muhim vazifalardan. Hozirda bu boradagi ko‘rsatkichlarning asosiy qismi Toshkent shahri hissasiga to‘g‘ri kelyapti. O‘zbekistondagi sharoit va imtiyozlar natijasida boshqa relokantlar ham mamlakatga kelishdan manfaat ko‘ryapti. Shu bois har bir hududda jozibador muhit yaratib, chet el kompaniyalarini jalb etish muhimligi taʼkidlandi.
Izoh (0)