O‘zbekiston prezidenti Shavkat Mirziyoyev turkman xalq milliy yetakchisi, Xalq maslahati raisi Gurbanguli Berdimuhamedovni tug‘ilgan kuni bilan tabrikladi. Bu haqda prezident matbuot xizmati xabar berdi.
Prezident o‘z tabrigida Berdimuhamedovga mustahkam sog‘lik, oilaviy baxt-saodat, qardosh Turkmanistonga tinchlik-osoyishtalik va ravnaq tilagan. Uning zamonaviy Turkmanistonni barpo etish va izchil rivojlantirish, mamlakatning xalqaro nufuzini oshirish, O‘zbekiston bilan Turkmaniston o‘rtasidagi do‘stlik, yaxshi qo‘shnichilik va strategik sheriklik munosabatlarini mustahkamlashga qo‘shgan shaxsiy hissasi e’tirof etilgan.
Turkman xalqi milliy yetakchisi O‘zbekiston prezidentiga Turkmaniston rahbari Serdar Berdimuhamedovning salomini yetkazgan. Yetakchilarning muntazam uchrashuvlari tufayli ikki tomonlama hamkorlikda yuksak darajaga erishilgani qayd etilgan.
Ikki davlat o‘rtasida tovar ayirboshlash va yuk tashish hajmi ortmoqda. Muhim kooperatsiya loyihalari amalga oshirilmoqda, jumladan, “Shovot—Toshovuz” chegaraoldi savdo zonasi qurilishi yakunlanmoqda.
Faol madaniy-gumanitar almashinuvlar amalga oshirilmoqda. Qo‘shma Hukumatlararo komissiya va Ishbilarmonlar kengashining navbatdagi yig‘ilishlari, Hududlararo forumni o‘tkazish rejalashtirilgan.
Telefon orqali muloqotda mintaqaviy hamkorlikning dolzarb jihatlari, shu jumladan sentyabr oyida Toshkentda o‘tkaziladigan Markaziy Osiyo davlatlari rahbarlarining yettinchi Maslahat uchrashuviga tayyorgarlik ko‘rish masalalari ham ko‘rib chiqilgan.
Izoh (0)