Qirg‘iziston prezidenti Sadir Japarov ish ko‘pligidan so‘nggi uch kundan buyon samolyotda uxlamoqda. Bu haqda mamlakat Milliy xavfsizlik qo‘mitasi raisi Qamchibek Tashiyev xabar berdi.
Tashiyevning so‘zlariga ko‘ra, prezident dam olish kunlariga qaramay o‘z vazifasini bajarishda davom etmoqda. Shu sababli shanba va yakshanba kunlari xorijga ta’tilga chiqqan yoki dam olgan amaldor jazolanadi.
Sadir Japarov davlat rahbari sifatida xalqaro munosabatlarni yo‘lga qo‘ymoqda. Uch-to‘rt kundan beri faqat samolyotda uxlayapti. Malayziyadan uchib keldi, Manas aeroportida samolyotiga yonilg‘i quyilgach, uyga bormasdan Minskka uchib ketdi. Kechasi qaytib keldi. Ba’zilar uni hayotdan zavqlanmoqda deb o‘ylaydi. Yo‘q.
Shuning uchun mahalliy hokimiyat, davlat amaldorlari shunday ishlashi kerak. Shanba va yakshanba kunlari bittasi ko‘lga, ikkinchisi tog‘ga, uchinchisi chet elga ta’tilga ketishi mumkin emas. Agar shunday holatni ko‘rsak, biz bu davlat xizmatchisini javobgarlikka tortib, lavozimidan ozod qilamiz, dedi Tashiyev.
Ma’lumot o‘rnida, 2023-yilning yozida Milliy xavfsizlik davlat qo‘mitasi rahbari Qamchibek Tashiyev vazirlarga Issiqko‘lda dam olish va ta’til olishni taqiqlagan edi.
Vazir bo‘lib kelgan ekansizlar, ishlanglar. Xalq dam olayotgan paytda, mashina minib aylanib yurishning va dam olishning hojati yo‘q. Biz ko‘p mehnat qilishimiz kerak. Birorta vazirning plyajda shorti kiyib, qorayib yotganini ko‘rmayin. Uyda dam olinglar. Ta’til bo‘lmaydi!, deb aytgandi u.
Izoh (0)