O‘zbekistonda sirtqi taʼlim tugatilishiga sabab taʼlim sifati bilan bog‘liq. Bu haqda Oliy taʼlim, fan va innovatsiyalar vaziri Qo‘ng‘irotboy Sharipov “Daryo” muxbiriga bergan intervyusida maʼlum qildi.
Prezident farmoniga asosan, yangi o‘quv yilidan sirtqi taʼlim shakliga qabul tugatildi. Vazir Qo‘ng‘irotboy Sharipovning aytishicha, mazkur taʼlim shaklidan voz kechilishi taʼlim sifati yetarli taʼminlanmagani bilan bog‘liq.
“Biz bu yo‘nalishda taʼlim sifatini 100 foiz taʼminlab bera olmaymiz. Chunki bilamizki, talabalarning ko‘pchiligi ish bilan band, vaqtida darsga kela olmaydi. Buni hammamiz ko‘rib turibmiz, yashirishga hojat yo‘q”, dedi vazirlik rahbari.
Suhbat davomida Qo‘ng‘irotboy Sharipov sirtqi o‘rniga masofaviy va uzaytirilgan taʼlim keng yo‘lga qo‘yilayotganiga urg‘u berdi.
“Endi o‘qiyman degan yoshlar masofaviy taʼlimga kirishi mumkin. Mazkur yo‘nalishda nazorat kuchliroq — talaba har kuni kompyuteridan darsga kirib, masofadan o‘qishi kerak bo‘ladi. O‘rniga boshqa odam kirsa yoki imtihonlarda qanaqadir ‘shpargalka’dan foydalanaman desa, uning kompyuteri avtomatik tarzda o‘chirib qo‘yiladi. Bu taʼlim sifati bilan bog‘langan masala. Sirtqining o‘rniga masofaviy taʼlim kiritilyapti. Biz to‘liq yopib tashladik degani emas. O‘zi butun dunyoda sirtqi taʼlim shakli yo‘q. Biz kredit-modul tizimiga o‘tdik, dunyodagi top-300 talik reytingdagi universitetlar dasturlarini qabul qilyapmiz. Xorijdan professor-o‘qituvchilarni ishga taklif qilyapmiz. Yevropa, Amerika yoki boshqa davlatlarga qarasangiz kunduzgi, kechki, masofaviy va uzaytirilgan taʼlim shakllari mavjud. Talabalarga institutni to‘rt yilda emas, 5–10 yilda ham bitirish imkoniyati beriladi. Shuning uchun bundan qo‘rqish kerak emas. O‘rniga muqobil taʼlim shakli berilyapti”, dedi vazir.
Maʼlumot uchun, sirtqi taʼlim shakliga qabul to‘xtatilgan bo‘lsa-da, hozirda mazkur shaklda tahsil olayotgan talabalar uchun barcha o‘quv jarayonlari belgilangan tartibda davom ettiriladi. Yaʼni ular tanlagan yo‘nalishlari bo‘yicha amaldagi davlat taʼlim standartlari, o‘quv rejalari va fan dasturlariga muvofiq o‘qishni yakuniga yetkazish imkoniyatiga ega.
Sirtqida o‘qib, belgilangan tartibda diplom olgan shaxslar O‘zbekiston qonunchiligiga muvofiq to‘liq oliy maʼlumotli mutaxassislar hisoblanadi. Ularga beriladigan diplom kunduzgi, kechki yoki masofaviy taʼlim shaklidagi diplomlar bilan teng yuridik kuchga ega.
Izoh (0)