O‘zbekistonda yoshlarga hayotda munosib o‘rin topishi uchun zarur sharoitlar yaratish eng asosiy vazifaga aylangan. Bu haqda Shavkat Mirziyoyev 30-iyun kuni yoshlar bilan uchrashuvida aytib o‘tdi.
“Yoshlarimizga sifatli ta’lim va tarbiya berish, zamonaviy kasb va hunarlar, xorijiy tillarni o‘rgatish, hayotda munosib o‘rin topishi uchun zarur sharoitlar yaratish eng asosiy vazifamiz va burchimizga aylangan”, dedi prezident.
Davlati rahbari hozirgi vaqtda dunyo notinch va murakkab bo‘lib borayotganini, tinchlik – eng buyuk ne’mat, inson qadri va adolat – eng oliy qadriyat ekani har qachongidan ham chuqur his etilayotganini ta’kidladi.
“Yuksak bilimli, dunyoqarashi keng, zamonaviy fikrlaydigan, texnologik savodxon yoshlari ko‘p bo‘lgan yurtda tinchlik va taraqqiyot, o‘zaro jipslik hamisha barqaror bo‘ladi”, dedi O‘zbekiston yetakchisi.
Uning qayd etishicha, so‘nggi yillarda O‘zbekiston iqtisodiyoti tez sur’atlar bilan o‘sib, barcha sohalarda imkoniyatlar ortib borayotganida, hech shubhasiz, siz yoshlarning ham munosib hissasi bor.
“Katta-katta davlatlar, dunyoning eng nufuzli kompaniyalari bugun bizga nega ishonmoqda? Nega milliardlab dollar investisiya kiritmoqda? Bu, albatta, bejiz emas. Chunki, hamkorlarimiz yoshlarimizning ilm-fan, ta’lim, IT, madaniyat, san’at va sportdagi yutuqlarini ko‘rib, salohiyatimizga baho bermoqda, ertangi kunimiz poydevori mustahkam ekaniga ishonch hosil qilmoqda”, dedi davlat rahbari.
Prezident matbuot xizmatining ma’lum qilishicha, Shavkat Mirziyoyev yoshlar bilan uchrashuv o‘tkazgach, bir guruh yigit-qizlarga davlat mukofotlarini topshiradi. Tadbirda yoshlarni qo‘llab-quvvatlash, salohiyati va iqtidorini yuzaga chiqarish bo‘yicha yangi tashabbuslar ilgari suriladi, ilhomlantiruvchi misollar, mamlakatning ertangi kunini belgilashga qodir g‘oyalar va yechimlar taqdim etiladi.
Shuningdek, davlat rahbari iqtidorli yoshlar bilan muloqot qilib, ularning innovatsiya, “yashil” iqtisodiyot, kreativ sanoat, tadbirkorlik va IT sohalaridagi ilg‘or ishlanmalari va yutuqlari bilan tanishadi.
Izoh (0)