Belarus prezidenti Aleksandr Lukashenko 30-iyun kuni fuqarolarga murojaat qilib, “mamlakatda urush yo‘qligi uchun amaldagi hokimiyatga duo qilishlari va minnatdor bo‘lishlari” kerakligini aytdi.
Lukashenko mamlakatda “harbiy holatga o‘xshash vaziyat” yuzaga kelganini ta’kidladi. U buni qishloq xo‘jaligidagi tobora chuqurlashayotgan muammolar bilan izohladi. Belarus prezidenti amaldorlarni “o‘z yerining egasi bo‘lishga” va kadrlar harakatini qat’iy nazorat qilishga chaqirdi.
Nega endi masalani bunchalik keskin qo‘yyapman? Mana, ko‘pchilik: “Krepostnoy huquq, krepostnoy huquq” deyapti. Quloq solinglar, yigitlar, hozirgi vaziyat — harbiy holatga o‘xshash. Biz urushga kirmaganimiz uchun xalq bu hokimiyatga duo qilishi kerak. Biz hanuz o‘zimizni bundan saqlab turibmiz. Ko‘ryapsizmi, atrofimizda nima bo‘layotganini — ichkarida muammolar paydo bo‘lishi bilanoq ularni kuchaytirishadi, bizga qo‘shimcha muammolar tashlashadi, dedi Belarus prezidenti.
Shuningdek, u agar hududlar rahbarlari mutaxassislar yetishmasligi haqida shikoyat qilsa, Minsk ularga “ikki-uchta nazoratchi” yuborishi bilan ogohlantirdi. Lukashenko agar ishchilar “o‘z ixtiyori bilan ketgan, qochib ketgan” bo‘lsa, “ularni ishga olganlar”ga e’tiroz bildirilishini aytdi.
Lukashenko kimdir yoki nimadir uchun “duo qilishga” ilk bor undayotgani yo‘q. U 2023-yil avgust oyida chet elliklar Belarus aholisi uchun ibodat qilishi kerakligini aytgan, chunki hukumat 2020-yildagi minglab norozilik namoyishlarini bostirishga erishganini ta’kidlagan.
Shuning uchun men chet elliklarga doim aytaman: siz belaruslar uchun ibodat qilishingiz kerak. Biz bu yerda turib, sizlarni uchinchi jahon urushidan saqlab qoldik, degan edi u.
2021-yilda esa Lukashenko BBC jurnalisti Stiven Rozenberkka bergan intervyusida: “Siz hali ham biz uchun ibodat qilishingiz kerak. Ibodat qiling! Chunki biz fashizmga qarshi urush olib borganmiz”, degan edi.
Belarusda qishloq xo‘jaligidagi muammolar
Belarusda kartoshka va ba’zi sabzavotlarning yetishmasligi kabi muammolar kuzatilmoqda. Lukashenko mamlakatda kartoshka tanqisligi kuchayganini tan olgan va bunda mahalliy fermerlarni ayblagandi. U fermerlar barcha kartoshkani narxi qimmatroq bo‘lgan Rossiyaga sotib yuborganini aytgan.
Fevral oyida Lukashenko hukumatga kartoshka narxining oshishi bilan bog‘liq muammoni hal qilishni topshirgan. Undan oldinroq esa oziq-ovqat zaxiralarini shakllantirishni talab qilgan, biroq hukumat bu topshiriqlarni bajara olmagan. Belarus prezidenti may oyida aholiga ham, Rossiyaga ham yetadigan darajada kartoshka yetishtirish vazifasini qo‘ygandi. Prezident Belarus “rus birodarlar”ga yordam ko‘rsatishi lozimligini aytgan.
May oyi oxirida Lukashenko chorva mollari nobud bo‘lishi ko‘lamiga ham e’tibor qaratgan edi. U bu antirekordga yetganini bildirgandi. Siyosatchi tezkor choralar ko‘rishni talab qilib, yechim variantlaridan birini taklif qilgan. Bu “samarasiz xo‘jaliklar”dan hayvonlarni sotib olish va ularni tegishli saqlash sharoitlari hamda veterinariya nazoratini ta’minlay oladigan xo‘jaliklarga topshirishni nazarda tutadi.
Izoh (0)