27—29-iyun kunlari Venetsiyada Amazon asoschisi Jeff Bezos va sobiq telejurnalist Loren Sanchesning to‘yi bo‘lib o‘tmoqda. CNBC xabariga ko‘ra, bayram uchun taxminan 50 mln dollar sarflangan.
Nikoh qasamyodi marosimi 27-iyun, juma kuni San-Jorjo xususiy orolida bo‘lib o‘tdi, deb yozadi The Guardian. Daily Mail nashrining yozishicha, Loren bayramda 27 ta libosini almashtirishi lozim.
Uch kun davom etadigan tadbirga 200 ga yaqin mashhurlar va biznes-elitaning vakillari, jumladan, prezident Donald Trampning qizi Ivanka Tramp va uning turmush o‘rtog‘i Jared Kushner, Bill Geyts, Opra Uinfri, Leonardo Di Kaprio, Asher va Kardashyanlar oilasi taklif etilgan. Mehmonlar orasida Orlando Blum ham bor edi.
Internetda dam olish kunlari Venetsiyaga kelayotgan taniqli shaxslarning suratlari tobora ko‘payib bormoqda. Qayd etilishicha, aksariyat mehmonlar avvalroq xususiy samolyot, yaxta va vertolyotlarda yetib kelgan. Reuters ma’lumotlariga ko‘ra, Venetsiyaning eng hashamatli beshta mehmonxonasi, jumladan, Cipriani va Aman mehmonlarni ular uchun band qilingan.
Asosiy to‘y marosimi kecha, 28-iyunda shaharning sharqiy qismidagi Arsenal tarixiy kemasozlik hududida bo‘lib o‘tadi. Avvalroq to‘y tantanasi Kannarejo tarixiy hududidagi Scuola Grande della Misericordia sobiq maktabi binosida o‘tkazilishi rejalashtirilgan edi, ammo mahalliy aholining noroziligi sababli marosim boshqa joyga ko‘chirildi. To‘y kunlari Bezosga qarshi chiqqan ba’zi faollar qayiqlarning mehmonlarni tashishiga to‘sqinlik qilish uchun mitinglar o‘tkazmoqchi.
Foto: Pravila jizni
Foto: Pravila jizni
Namoyishchilarning e’tirozlari faqat to‘yga emas, balki shahar hokimiyatiga, xususan, Venetsiya meriga ham qaratilgan. U 2024-yildan buyon korrupsiya ayblovi bilan tergov ostida. Namoyishchilarning ta’kidlashicha, u “shaharni Bezosga sotgan”, ilgari esa shaxsiy manfaatlari uchun investorlarga yerlar berib kelgan.
Forbes ma’lumotlariga ko‘ra, dunyodagi eng boy odamlardan biri, boyligi 230 mlrd dollarga baholanayotgan Bezos to‘y sharafiga bir qator xayriyalarni amalga oshirmoqchi, xususan, Venetsiya ko‘rfazi ekotizimini o‘rganuvchi ilmiy tashkilotga 2 million yevro ajratmoqchi.
Foto: Pravila jizni
OAVda Bezos va Sanchesning to‘yiga taklifnoma suratlari ham paydo bo‘lgan. Ushbu taklifnomada aytilishicha, er-xotin mehmonlardan sovg‘alar o‘rniga xayriya ishlariga mablag‘ ajratishni so‘ragan.
To‘yni tashkillashtirish bilan avvalroq Jorj va Amal Klunilarning nikoh marosimini o‘tkazgan Londonning Lanza & Baucina agentligi shug‘ullanmoqda. Boshqa bayram tadbirlari doirasida ko‘pikli bayram dasturi va “Buyuk Getsbi” uslubidagi mehmondorchilik kechasi o‘tkazilishi rejalashtirilgan.
Bezosning Sanches bilan munosabatlari haqida 2019-yil boshida ma’lum bo‘lgan, o‘shanda milliarder 25 yillik turmushidan so‘ng Makkenzi Skott bilan ajrashgan edi. 2023-yilning may oyida tadbirkor Lorenga turmush qurishni taklif qilgan.
Izoh (0)