Rim papasi Lev XIV mashhur san’atkorlar va siyosatchilar bilan qarindoshlik aloqalariga ega ekani ma’lum bo‘ldi. Bu haqda The New York Times tarixchi Genri Luis Geyts kichik olib borgan tadqiqotga tayanib yozmoqda.
Manbaga ko‘ra, Lev XIV papalikdan oldingi ismi Robert Prevost bo‘lib, u Chikagoda tug‘ilgan. U Madonna va Jastin Biber bilan umumiy ajdod — Kanadaning Trua Rivyer shahrida tug‘ilgan zodagon Lui Bushe de Granpre orqali bog‘langan. Tadqiqotda u taxminan olti avlod avval yashagani aytilmoqda.
Qizig‘i shundaki, papaning nasabida ushbu ajdodning borligi uni Kanadaning sobiq bosh vaziri Jastin Tryudo, aktrisa Anjelina Joli va AQSH siyosatchisi Hillari Klinton bilan ham uzoq qarindosh ekanini bildiradi.
Mutaxassislarning ta’kidlashicha, bunday holatlar ayniqsa Kanada aholisi orasida keng tarqalgan. Bunga Shimoliy Amerika va Yevropada yuzlab yillar davomida shakllangan murakkab nikoh va migratsion jarayonlar sababdir.
Ayniqsa, Fransiya, Irlandiya va Shotlandiyadan Kanadaga ko‘chgan muhojirlar orasida oilalar avlodlar davomida bir-biriga tutashgan. XVII–XIX asrlarda Kanada hududidagi nasroniy jamoalarda turmush qurish darajasi yuqori bo‘lgan va ko‘plab oilalar bir-biri bilan qarindoshlikka kirib borgan. Shu sababli, hozirgi kunda Kanadada tug‘ilgan ko‘plab mashhur shaxslar uzoq qarindosh bo‘lishi mumkin.
Izoh (0)