Koreya Xalq Demokratik Respublikasi Xitoy tomonga 10 dan ortiq ballistik raketa uchirdi. Bu haqda Reuters xabar bermoqda.
Agentlik ma’lumotlariga ko‘ra, raketalar 19-iyun kuni Pxenyan yaqinidagi Sunan shahridan shimoli-g‘arbiy yo‘nalishda uchirilgan.
Hozircha boshqa tafsilotlar keltirilmayapti. Agentlikning ta’kidlashicha, qo‘llanilgan qurol-yarog‘lar odatda Janubiy Koreya harbiy kuchlari tomonidan qisqa masofali ballistik raketalar sifatida tasniflanadi.
Bundan oldin KXDR rahbari Kim Chen In Shimoliy Koreya harbiylarini urushga tayyor turishga chaqirgan edi.
Davlat rahbari Koreya Xalq armiyasining birinchi gvardiyachi harbiy-havo diviziyasiga qarashli aviatsiya polkiga tashrif buyurdi. U yerda Shimoliy Koreya harbiy-havo kuchlari aviatsiya bo‘linmalarining jangovar mashqlariga rahbarlik qilgan.
Mashqlar davomida Shimoliy Koreya harbiylari havo hujumidan mudofaa vazifalarini bajarish bo‘yicha aviatsiya bo‘linmalari, zenit-raketa qismlari, radar va radioelektron kurash bo‘linmalarining ko‘nikmalarini sinovdan o‘tkazgan. Shuningdek, ular qanotli raketalar va hujumkor kamikadze-dronlarni yo‘q qilishni mashq qilgan.
Ta`kidlanishicha, BMT Xavfsizlik kengashi qarorlari Shimoliy Koreyaga ballistik raketalardan foydalanishni taqiqlagan.
Bu so‘nggi paytlarda sodir bo‘lgan yagona holat emas. May oyi boshida Shimoliy Koreya Yapon dengizi tomon noma’lum ballistik raketa uchirgani haqida Yonhap agentligi xabar bergan edi. Keyinroq agentlik bir nechta qisqa masofali ballistik raketalar uchirilgan bo‘lishi mumkinligini aniqlashtirdi.
Bundan tashqari, 10-mart kuni Pxenyan Sariq dengiz tomonga bir nechta ballistik raketa uchirdi. Ayni kuni AQSH va Janubiy Koreyaning qo‘shma harbiy mashqlari boshlandi, bu esa KXDRning keskin tanqidiga sabab bo‘ldi.
21-mart kuni Shimoliy Koreya zenit-raketa tizimini, fevral oyi oxirida esa strategik qanotli raketalarni sinovdan o‘tkazdi. O‘shanda KXDR rahbari Kim Chen In bunday sinovlardan maqsad ehtimoliy raqiblarni ogohlantirish va “turli yadroviy vositalarning qo‘llashga tayyorligini” namoyish etish ekanini ta’kidlagan edi.
Izoh (0)