“Oltin malina” mukofoti “Oskar”ning aksi bo‘lib, yil davomidagi eng yomon rol va filmlar uchun topshiriladi. Ko‘pchilik mashhurlar bu mukofotni e’tiborsiz qoldirishga intilsa-da, omadsizligiga kinoya bilan qaraydiganlar ham uchrab turadi.
Xolli Berri
Amerikalik aktrisa Xolli Berri 2005-yilda “Mushuk ayol” jangovar filmidagi bosh roli uchun “Oltin malina” antimukofotiga sazovor bo‘lgan. Film hamon tomoshabinlar orasida turli xil fikrlar uyg‘otmoqda. U zerikarli syujet, aktyorlarning o‘rtacha ijrosi va sifatsiz vizual effektlari uchun tanqidga uchramoqda.
Xolli Berri “Oltin malina” marosimiga qo‘lida “Oskar” mukofoti bilan tashrif buyuradi (u “Maxluqlar bazmi” melodramasida eng yaxshi ayol roli uchun bu mukofotni qo‘lga kiritgan edi). Aktrisa ikkala haykalchani qo‘liga olib, shunday dedi: “Meni qanchalik tanqid qilmang, “Oskar”imni hech qachon mendan tortib ololmaysiz”.
Sandra Bullok
Sandra Bullokka “Oltin malina” mukofoti “Stiv haqida hamma narsa” komediyasidagi roli uchun berildi. Filmda u CCN telekanalining erkak operatorini ta’qib qilib, uni o‘ziga oshiq qilishga urinayotgan krossvord tuzuvchisi rolini ijro etadi. Tanqidchi va tomoshabinlarning e’tirozlari asosan filmning zaif sahnalashtirishi, yumor yo‘qligi va g‘alati syujetga qaratilgan edi. Ammo Bullok xonim bunday xulosalarga qo‘shilmadi.
“Oltin malina” marosimiga aktrisa “Stiv haqida hamma narsa” DVD disklari ortilgan aravacha olib keladi va ishtirokchilardan komediyani yana bir bor ko‘rib chiqishlarini so‘raydi. Qizig‘i shundaki, deyarli ayni shu kuni Sandra Bullok “Ko‘rinmas tomon” filmidagi eng yaxshi ayol roli uchun “Oskar” mukofotini ham qo‘lga kiritadi.
Ben Afflek
Amerikalik aktyor Ben Afflek 2004-yilda Larri Kingning jonli shousida “Eng yomon aktyor” nominatsiyasida “Qasos vaqti”, “Qo‘rqmas” va “Jili” filmlaridagi rollari uchun taqdirlanadi.
Kingning dasturiga kelishdan oldin, Afflek hazillashib “Oltin malina” marosimiga taklif etilmaganidan xafa bo‘lganini aytgan edi. Aktyor nihoyat mukofotni qo‘liga olgach, “Biroz arzonroq ko‘rinadi” deydi va haykalchani qismlarga ajratishga tushadi. Shundan so‘ng Ben Afflek tomonidan buzilgan “Oltin malina” eBay saytida sotuvga qo‘yiladi va u deyarli ming dollarga sotiladi. Bu mablag‘ 2005-yildagi “Oltin malina” marosimini o‘tkazish uchun joy ijara haqini to‘lashga sarflanadi.
Tom Grin
Janjalkash aktyor va rejissyor Tom Grin 2001-yilda o‘zining “Yo‘qol, Freddi” komediyasi bilan “Oltin malina” anti-mukofoti hakamlarini lol qoldirdi. Aytgancha, filmning ssenariysini ham Tom Grinning o‘zi yozgan va bosh rolni ham o‘zi ijro etgan. Film bir vaqtning o‘zida bir nechta, jumladan “Eng yomon film” nominatsiyasida g‘olib bo‘ladi.
Grin “Oltin malina”marosimiga tashrif buyuradi. U anti-mukofot tomoshabinlariga bu mukofotga loyiq emasligini aytadi. Shundan so‘ng Tom Grin uni kuch bilan sahnadan olib ketishmaguncha, lab garmonchasini chalishda davom etadi.
Izoh (0)