Britaniyalik xonanda Dua Lipa 34 yoshli aktyor Kallum Ternerga turmushga chiqmoqda. Xonanda Vogue jurnaliga bergan intervyusida unashtiruv haqidagi yangilik bilan bo‘lishdi. “Ha biz unashtirildik. Bu juda hayajonli. Menga u sovg‘a qilgan uzuk juda yoqdi. U menga mos keldi. Qolgan umringni birga o‘tkazmoqchi bo‘lgan insoning seni yaxshi bilishini anglash yoqimli,” deydi ijrochi.
Shuningdek, u aynan sevgilisi bilan hayotini bo‘lishishni xohlashini taʼkidladi: “Birga qarish, birga hayot kechirish va shunchaki, abadiy eng yaxshi do‘st bo‘lish qarori — bu haqiqatan ham o‘ziga xos tuyg‘u.”
29 yoshli Dua Lipa va 34 yoshli Kallum Terner o‘rtasidagi munosabatlar 2024-yil boshida maʼlum bo‘ldi. Juftlik o‘z munosabatlarini yashirmagan, biroq ijtimoiy tarmoqlarda birgalikdagi suratlarni ulashishga shoshilmagan. Faqat yarim yil o‘tgach, xonanda aktyor bilan munosabatlarini tasdiqladi, u bilan birgalikda tushgan kadrlarni o‘z blogida eʼlon qildi. 27-dekabr kuni esa aktyor ijrochiga turmush qurish taklifini bildirgani maʼlum bo‘ldi.
Avvalroq tabloidlar Dua Lipa va Kallum Terner butun London tilga olgan ziyofat uyushtirmoqchi ekanliklari haqida xabar bergan edi. Mehmonlar orasida Bella Hadid, Emma Stoun, Garri Stayls va boshqa Gollivud yulduzlari bor. Endi banket nima sababdan bo‘lishi maʼlum bo‘ldi.
Izoh (0)