DC Studios rahbarlaridan biri Jeyms Gann Entertainment Weekly nashriga bergan intervyusida “Mo‘jizakor ayol” haqidagi yangi film uchun ssenariy yozilayotganini tasdiqladi. Ma’lumotlarga ko‘ra, film uchun kasting hali o‘tkazilmagan.
DC kinematografiya olamining qayta ishga tushirilayotgan loyihalaridan birinchi filmi “Supermen” AQShda 11-iyuldan boshlab namoyish etiladi. 2026-yil 26-iyun kuni esa Supermenning amakivachchasi haqidagi film — “Supergirl” premyerasi rejalashtirilgan. Unda “Ajdarlar uyi” seriali orqali tanilgan Milli Olkok bosh rolni ijro etadi.
Yangi Supermen va Lois Leyn rollarini kim ijro etishi 2023-yil iyun oyida ma’lum bo‘lgan, bu rollarni Devid Korensvet va Reychel Brosnaxen gavdalantiradi. Korensvet ilgari “Gollivud”, “Siyosatchi” seriallari hamda “Pearl” filmida suratga tushgan.
Brosnaxen “Dollar uchun o‘lim”, “Josuslar o‘yini”, “To‘fon boshlanganda” kabi filmlarda ishtirok etgan. U “Ajoyib Meyzel xonim” serialidagi roli uchun Emmi va Oltin globus mukofotlarini qo‘lga kiritgan.
Korensvet Supermen rolini o‘ynagan to‘rtinchi aktyor bo‘ladi. Birinchi bo‘lib bu rolni 1978-yilgi “Supermen” filmida Kristofer Riv ijro etgan va u keyingi uchta filmda ham suratga tushgan. 2006-yilda esa Brayan Singerning “Supermenning qaytishi” filmida Bredon Raut ishtirok etgan, ammo film tijoriy muvaffaqiyat qozona olmagan.
10 yil avval britaniyalik Genri Kavill “Po‘lat odam” filmida Supermen rolini ijro etdi, shuningdek, “Betmen va Supermen” (2016) hamda “Adolat ligasi” (2017) filmlarida ham ishlagan. Kavill rolni davom ettirish niyatida edi, biroq Gann va DC’ning yana bir rahbari Piter Safran bu safar yoshroq aktyorni tanlashni ma’qul ko‘rdi.
Avvalgi DC filmlarida Mo‘jizakor ayol obrazini Gal Gadot gavdalantirgan edi. U birinchi bor 2016-yilgi “Betmen Supermenga qarshi: adolat tongi” filmida shu roli bilan ekranlarga chiqqan. Rejissyor Petti Jenkins tomonidan 2017 va 2020-yillarda mo‘jizakor ayol obraziga bag‘ishlangan ikki mustaqil film namoyish etildi.
Ammo Gann va Safran DC Studios rahbarligiga kelgach, Jenkinsning uchinchi film bo‘yicha rejalariga nuqta qo‘yildi. Bu esa Gal Gadotning franshizadagi kelajagini shubha ostiga qo‘ydi. Shunga qaramay, aktrisa 2023-yil avgustida bergan intervyusida yana mo‘jizakor ayol roliga qaytishiga ishonishini bildirgan.
Izoh (0)