Yumushlar ko‘payib, o‘zingizga vaqt ajratish haqida o‘ylash esa deyarli imkonsizdek ko‘rinadi. Lekin kuniga atigi besh daqiqa ajratish to‘liq go‘zallik parvarishining o‘rnini bosishi mumkin. Ushbu maqolada bir necha daqiqa vaqt ajratib ham samarali bo‘ladigan beshta go‘zallik odatlari haqida so‘z boradi.
Teri va miyani “uyg‘otish” uchun muz bo‘laklari
Oddiy va foydali odatlardan biri — ertalab yuzni muz bo‘laklari bilan artishdir. Bir marta bajarish uchun ikki dona muz bo‘lagi yetarli. Ularni yupqa matodan ishlangan salfetkaga o‘rab, yuzingizni yengil aylana harakatlar bilan artasiz. Buni massaj chiziqlari bo‘ylab bajarish lozim. Bunday muzli massaj uch daqiqadan ko‘p davom etmasligi kerak.
Jarayon davomida yuzdagi qon tomirlari keskin torayadi, keyin esa kengayadi — natijada qon aylanishi yaxshilanadi, shishlar yo‘qoladi va teri yorqin ko‘rinishga ega bo‘ladi. Muz bo‘laklari ta’sirida noradrenalin gormonining ajralishi yuzaga keladi, natijada siz tezroq uyg‘onasiz. Shuningdek, muz bo‘laklari uchun faqat suv emas, yashil choy yoki moychechak damlamasini ham ishlatish mumkin.
Muz bilan massaj qilishni Gollivud yulduzlari juda yaxshi ko‘radi. Masalan, aktrisa Kameron Diaz buni har kuni bajaradi va keyin yuziga niqob surtadi. Keyt Blanshet esa yuzini muz bilan artishni 20 yildan ortiq vaqtdan beri davom ettirmoqda.
Kutikula yog‘i: “qimmat” manikyurning siri
Koko Shanel qo‘llarni ayolning tashrif qog‘ozi deb atagan. Chunki ular har doim ko‘zga tashlanib turadi va ularning parvarishi haqida ko‘p narsani aytib beradi. Ammo oddiy manikyur va qo‘l kremi yetarli emas.
Qo‘llarni parvarish qilish uchun kutikula yog‘idan foydalaning. U tirnoq atrofidagi terini yumshatadi, himoya qiladi va shikastlanishini oldini oladi. Kutikula yog‘idan foydalanish bir necha daqiqa vaqt oladi, ammo qo‘l va tirnoqlar doim mukammal ko‘rinadi.
Yulduzlardan o‘rnak oling: Mirranda Kerr va Kayli Minoug doimiy ravishda kutikula yog‘idan foydalanadi.
Quloq massaji: stressdan tezda qutulishning oddiy usuli
Quloq massaji — asab tizimini faollashtirish va kun uchun energiya yig‘ishning ajoyib usuli hisoblanadi. Quloqda miyaga bog‘langan 110 ta biologik faol nuqta mavjud. Quloq burmalarining 1–2 daqiqalik massaji stress gormoni kortizol miqdorini kamaytiradi, bosh og‘rig‘ini yengillashtiradi va yuzga qon oqimini kuchaytiradi. Massajni quloqning yuqori chetidan boshlab, asta-sekin pastga tomon davom ettiring.
Aktrisa Jennifer Eniston quloq massajini muntazam bajaradi.
Kayfiyat uchun aromaterapiya
Bir necha daqiqalik aromaterapiya kuchli stressni yengillashtirishga, kun oxirida dam olishga yoki aksincha, oldinda turgan ishlar uchun kayfiyatni ko‘tarishga yordam beradi. Bir necha tomchi efir yog‘ini vannaga qo‘shishingiz yoki salfetkaga surib, uning hididan nafas olishingiz mumkin. Ta’sirni kuchaytirish uchun meditatsiya qilish, tinchlantiruvchi musiqani yoki tabiat tovushlarini tinglash foydali.
Qanday natijaga erishmoqchi bo‘lsangiz, shunga qarab tanlang:
lavanda, gul — tashvishlarni kamaytiradi;
sitrus, yalpiz — qahvadan ham yaxshi tetiklashtiradi;
vanil, sanda daraxti — xavfsizlik hissini yaratadi;
limon, evkalipt — asabiylikni kamaytiradi.
Ammo yog‘dan haddan tashqari ko‘p foydalanmaslik muhim. Chunki uzoq vaqt davomida aromatdan chuqur nafas olish bosh og‘rig‘iga olib kelishi va kayfiyatni buzishi mumkin. 5–10 daqiqa yetarli.
Qiziq fakt: aromaterapiya — Shakira uchun og‘ir kun yoki uch soatlik konsertdan keyin stressni kamaytirishning sevimli usuli hisoblanadi.
Yuzni roller bilan massaj qilish
Uch daqiqalik roller bilan massaj salon protseduralari kabi samarali bo‘lishi mumkin. Asosiysi — muntazamlik va massaj chiziqlari bo‘yicha harakat qilish. Ushbu oddiy protsedura detoks ta’siriga ega va yuz rangini yaxshilaydi. Shuningdek, bunday massaj kollagen sintezini oshiradi. Ta’sir yanada kuchayishi uchun avval gialuron kislotasi tarkibli serumni surtib, darhol massaj qilish tavsiya etiladi.
Harakatlaringizni markazdan chetga tomon bajaring: yanoqdan quloqlarga, lab burchaklaridan temporal sohalarga, burun tagidan sochga qarab. Qo‘shimcha sifatida, rollerni muzlatkichda saqlash mumkin.
Aktrisa Gvinet Peltrou yuz massajini uy sharoitida roller bilan qilishni juda yaxshi ko‘radi. Supermodel Naomi Kempbell esa mezoroller — ingichka ignalarga ega massaj qurilmasidan foydalanadi. U qon aylanishini stimulyatsiya qilib, hujayralarning yangilanishini tezlashtiradi.
Kuniga atigi besh daqiqa vaqt ajratish sezilarli foyda keltiradi.
Izoh (0)