Koreya kinosining kuchli tomonlaridan biri osiyolik rejissyorlarning turli yosh va millatdagi insonlarga ta’sir qiladigan jonli hikoyalar yaratish iste’dodidir. Bunday filmlardagi bir qarashda oddiy tuyulgan syujet zamirida bir nechta dolzarb ijtimoiy mavzular yashiringan. Masalan, voyaga yetish, o‘zligini anglash, hayotning barcha bosqichlarida shaxslararo munosabatlarning murakkabligi kabi masalalar aks ettiriladi.
“Pandani qutqarish”
- Xalqaro nomi: Mr. Zoo: The Missing VIP
- Ishlab chiqarilgan yili: 2020-yil
- Rejissyor: Kim Tae-yun
- Yosh chegarasi: 12+
Xitoy Xalq Respublikasi boshqa davlatlar bilan muloqot o‘rnatishning o‘ziga xos vositasiga ega — panda diplomatiyasi: Xitoy do‘stlik va mustahkam xalqaro aloqalar ramzi sifatida hamkorlariga qora-oq ayiqlarni vaqtinchalik beradi. Shunday voqea “Pandani qutqarish” komediyasiga asos bo‘lgan. Minmin ismli hayvon Janubiy Koreyaga XXRdan ikki mamlakat o‘rtasidagi diplomatik munosabatlarning 25 yilligi munosabati bilan o‘tkaziladigan tantanali marosimga keltiriladi.
Pandani qo‘riqlash vazifasini maxsus agent Chu o‘z zimmasiga oladi, bu orqali lavozimda ko‘tarilishni umid qiladi. Biroq pandani jinoyatchilar o‘g‘irlab ketishadi, Chu nafaqat himoyasidagi hayvonni, balki hushini ham yo‘qotadi. O‘ziga kelgach esa hayvonlar tilini tushuna olishini anglaydi. Film turli xil hayvonlar (xususan, nafaqaga chiqish arafasidagi politsiya iti) ishtirokidagi kulgili lavhalarga boy bo‘lib, chuqur mavzular — o‘zaro yordam, insoniylik, hayvonlarga nisbatan g‘amxo‘r munosabatda bo‘lish zaruratini qamrab oladi.
“Dada”
- Xalqaro nomi: Papa
- Ishlab chiqarilgan yili: 2012-yil
- Rejissyor: Xan Ji-sin
- Yosh chegarasi: 12+
“Dada” dramasida qiz bilan ota o‘rtasidagi murakkab munosabatlar yoritiladi. Bunda gap biologik ota haqida emas, balki o‘gay ota to‘g‘risida bo‘lib, u hatto hech kimning otasi bo‘lishni rejalashtirmagan edi. Biroq koreyalik musiqa prodyuserining AQSHda qolish maqsadida tuzgan soxta nikoh shartnomasi to‘satdan fojiaga — uning rasmiy xotinining halok bo‘lishiga olib keladi.
Turli millatga mansub olti bolaning yagona vasiysi bo‘lib qolgan Chxun Sob dastlab vaziyatni vaqtinchalik qiyinchilik deb biladi va ularning hech biri bilan aloqa o‘rnatishni xohlamaydi. Ammo asrandi qizi Junning noyob qo‘shiqchilik iste’dodi uni fikridan qaytishga majbur qiladi. Avvaliga u qizdan o‘z manfaati yo‘lida foydalanishga urinadi, keyinchalik esa nafaqat unga, balki uning aka-ukalari va opa-singillariga ham chinakamiga bog‘lanib qolganini anglaydi.
“Yigirma”
- Xalqaro nomi: Twenty
- Ishlab chiqarilgan yili: 2015
- Rejissyor: Li Byong-hon
- Yosh chegarasi: 16+
“Yigirma” filmida turli xarakter va ijtimoiy kelib chiqishga ega bo‘lgan uch do‘st haqida hikoya qilinadi. Chi-ho — ishsiz, ota-onasi hisobiga kun kechiradigan, uchrashuvlar va qizlarga mukkasidan ketgan xushtor; Kyong-je — tirishqoq va uyatchan universitet talabasi, korporatsiyada karyera qilishni orzu qiladi; Don-u esa endigina ish boshlagan manga rassomi, oilasining moliyaviy qiyinchiliklari tufayli ertalabdan kechgacha ishlashga majbur. Vaziyatlari turlicha bo‘lsa-da, ularning umumiy jihatlari ham yetarli: birinchidan, do‘stliklari, ikkinchidan esa uchalasi ham bosib o‘tishi lozim bo‘lgan ulg‘ayish yo‘lidagi to‘siq. Birinchi muhabbat, birinchi ko‘ngilsizlik, birinchi xiyonat — qahramonlar bularning barchasini ilk bor boshdan kechiradi va har biri qiyinchiliklarni o‘zicha yengishga, o‘zligini yo‘qotmaslikka harakat qiladi.
“7-bo‘lmadagi mo‘jiza”
- Xalqaro nomi: Miracle in Cell No. 7
- Ishlab chiqarilgan yili: 2013
- Rejissyor: Li Xvan-gyon
- Yosh chegarasi: 16+
“7-bo‘lmadagi mo‘jiza” koreys kinematografiyasining eng mashhur asarlaridan biri. Syujet markazida rivojlanishida o‘ziga xos xususiyatlari bo‘lgan, og‘ir jinoyatda nohaq ayblanib qamoqqa tashlangan erkakning hikoyasi turadi. Biroq u yerda ham qahramon umidini yo‘qotmaydi va kameradoshlarining hamda xodimlarning shunchalik mehrini qozonadiki, ular tavakkal qilib, qoidalarga ko‘ra qat’iyan taqiqlangan bo‘lsa-da, qizalog‘i bilan uchrashuvini uyushtirishga qaror qilishadi.
Ushbu mashhur dramaning turli talqinlarini to‘rtta mamlakat — Hindiston, Turkiya, Indoneziya va Filippin allaqachon suratga olgan, shuningdek, ispan va Gollivud remeyklari ham rejalashtirilmoqda.
“Xotirasiz sevgi”
- Xalqaro nomi: Love Reset / 30 kun
- Ishlab chiqarilgan yili: 2023
- Rejissyor: Nam De-jun
- Yosh chegarasi: 18+
“Xotirasiz sevgi” romantik komediyasi turli daromad va ijtimoiy mavqega ega oilalardan kelib chiqqan er-xotin munosabatlarining boshi berk ko‘chaga kirib qolgani haqida hikoya qiladi. Janjal va kelishmovchiliklardan charchagan Chon-yol va Na-ra ajrashishga qaror qilishadi. Biroq qonunga ko‘ra, ular nikohning rasman bekor qilinishini kutib, yana 30 kun birga yashashlari kerak. Sud binosidan uyga qaytayotganda er-xotin avtohalokatga uchraydi, natijada ikkalasi ham xotirasini yo‘qotadi. Kasalxonada o‘zlariga kelgach, qahramonlar bir-birlarini qaytadan taniy boshlaydi va ular o‘rtasida yana his-tuyg‘ular alangalanadi. Garchi boshidanoq tengsiz nikohga qarshi bo‘lgan oilalari juftlikni ajrashishga undagan sabablarni eslatishga va jarayonni oxiriga yetkazishga harakat qilishsa-da, sevgi g‘alaba qozonadi.
“Xavfli kasb”
- Xalqaro nomi: Extreme Job
- Ishlab chiqarilgan yili: 2019-yil
- Rejissyor: Li Byon-xon
- Yosh chegarasi: 18+
Syujetga ko‘ra, beshta omadsiz politsiyachi giyohvand moddalar savdogarlari to‘dasini kuzatib, ularning iniga yaqin joyda bino ijaraga olishadi va shubha uyg‘otmaslik uchun u yerda ovqatlanish restoranini ochishadi. Restoran kutilmaganda juda mashhur bo‘lib ketadi: politsiyachilardan birining maxsus retsepti bo‘yicha tayyorlangan tovuq go‘shti uchun uzun navbatlar paydo bo‘la boshlaydi, jinoyatchilarni qo‘lga olish esa ikkinchi darajali masalaga aylanib qoladi.
Izoh (0)