“Олтин малина” мукофоти “Оскар”нинг акси бўлиб, йил давомидаги энг ёмон рол ва фильмлар учун топширилади. Кўпчилик машҳурлар бу мукофотни эътиборсиз қолдиришга интилса-да, омадсизлигига киноя билан қарайдиганлар ҳам учраб туради.
Холли Берри
Америкалик актриса Холли Берри 2005 йилда “Мушук аёл” жанговар фильмидаги бош роли учун “Олтин малина” антимукофотига сазовор бўлган. Фильм ҳамон томошабинлар орасида турли хил фикрлар уйғотмоқда. У зерикарли сюжет, актёрларнинг ўртача ижроси ва сифатсиз визуал эффектлари учун танқидга учрамоқда.
Холли Берри “Олтин малина” маросимига қўлида “Оскар” мукофоти билан ташриф буюради (у “Махлуқлар базми” мелодрамасида энг яхши аёл роли учун бу мукофотни қўлга киритган эди). Актриса иккала ҳайкалчани қўлига олиб, шундай деди: “Мени қанчалик танқид қилманг, “Оскар”имни ҳеч қачон мендан тортиб ололмайсиз”.
Сандра Буллок
Сандра Буллокка “Олтин малина” мукофоти “Стив ҳақида ҳамма нарса” комедиясидаги роли учун берилди. Фильмда у CCN телеканалининг эркак операторини таъқиб қилиб, уни ўзига ошиқ қилишга уринаётган кроссворд тузувчиси ролини ижро этади. Танқидчи ва томошабинларнинг эътирозлари асосан фильмнинг заиф саҳналаштириши, юмор йўқлиги ва ғалати сюжетга қаратилган эди. Аммо Буллок хоним бундай хулосаларга қўшилмади.
“Олтин малина” маросимига актриса “Стив ҳақида ҳамма нарса” DVD дисклари ортилган аравача олиб келади ва иштирокчилардан комедияни яна бир бор кўриб чиқишларини сўрайди. Қизиғи шундаки, деярли айни шу куни Сандра Буллок “Кўринмас томон” фильмидаги энг яхши аёл роли учун “Оскар” мукофотини ҳам қўлга киритади.
Бен Аффлек
Америкалик актёр Бен Аффлек 2004 йилда Ларри Кингнинг жонли шоусида “Энг ёмон актёр” номинациясида “Қасос вақти”, “Қўрқмас” ва “Жили” фильмларидаги роллари учун тақдирланади.
Кингнинг дастурига келишдан олдин, Аффлек ҳазиллашиб “Олтин малина” маросимига таклиф этилмаганидан хафа бўлганини айтган эди. Актёр ниҳоят мукофотни қўлига олгач, “Бир оз арзонроқ кўринади” дейди ва ҳайкалчани қисмларга ажратишга тушади. Шундан сўнг Бен Аффлек томонидан бузилган “Олтин малина” eBay сайтида сотувга қўйилади ва у деярли минг долларга сотилади. Бу маблағ 2005 йилдаги “Олтин малина” маросимини ўтказиш учун жой ижара ҳақини тўлашга сарфланади.
Том Грин
Жанжалкаш актёр ва режиссёр Том Грин 2001 йилда ўзининг “Йўқол, Фредди” комедияси билан “Олтин малина” анти-мукофоти ҳакамларини лол қолдирди. Айтганча, фильмнинг сценарийсини ҳам Том Гриннинг ўзи ёзган ва бош ролни ҳам ўзи ижро этган. Фильм бир вақтнинг ўзида бир нечта, жумладан “Энг ёмон фильм” номинациясида ғолиб бўлади.
Грин “Олтин малина”маросимига ташриф буюради. У анти-мукофот томошабинларига бу мукофотга лойиқ эмаслигини айтади. Шундан сўнг Том Грин уни куч билан саҳнадан олиб кетишмагунча, лаб гармончасини чалишда давом этади.
Изоҳ (0)