Gollivudda ko‘plab yutuqqa erishgan aktyorlar ham xatoga yo‘l qo‘yishi mumkin. Quyida hayotining bir bosqichida qamoqqa tushgan mashhurlar haqida so‘z yuritamiz. Ularning ayrimlari bu qorong‘i davrdan chiqib keta oldi, boshqalarning hayoti esa birgina noto‘g‘ri qaror sababli izdan chiqdi.
Robert Dauni
Robert Dauni giyohvandlikka qaramligi sabab ko‘plab muammolarga duch kelgan. 1996-yilda u noqonuniy moddalar va to‘pponcha saqlagani uchun hibsga olinib, uch yil sinov muddati bilan jazolangan. U muntazam narkotik test topshirishi lozim edi, biroq aktyor bu talablarni bajarmagan va qo‘shnisining uyiga noqonuniy kirgani uchun yana hibsga olingan. 1997-yilda u Los Anjeles okrugi qamoqxonasida to‘rt oy o‘tirgan.
Dauni qamoq tajribasini juda og‘ir deb eslaydi. 2001-yilda yana hibsga olingani uni “Elli Makbil” serialidagi roldan mahrum qildi. Ammo 2003-yilga kelib, rafiqasi Syuzan Levin va do‘sti Mel Gibsonning yordami bilan Robert giyohvandlikni yengdi. Gibson uning kino olamiga qaytishiga ko‘maklashdi.
Bu voqealar aktyorning karyerasiga putur yetkazmay, aksincha burilish nuqtasiga aylandi. Reabilitatsiyadan so‘ng u “Temir odam” filmida rol o‘ynab, dunyo yulduziga aylandi va Marvel olamining asosiy qahramonlaridan biriga aylandi. Robert Daunining “Sherlok Xolms”, “Omadsizlik harbiylari” va “Oppengeymer” filmlaridagi rollari unga “Oskar”ni olib keldi. Hozirda u Gollivudning eng yirik loyihalarida suratga tushishda davom etmoqda.
Mark Uolberg
O‘smirligida janjal va narkotiklar sabab 25 marta politsiyaga borishiga to‘g‘ri kelgani yetmagandek, Mark Uolberg 1986-yilda 15 yoshida afroamerikalik bolalarga irqchilik so‘zlari bilan kamsitib, ularga g‘isht otgan. 1988-yilda esa mast holatda ikki vyetnamlikka hujum qilgan: ulardan birini hushidan ketguncha kaltaklagan, ikkinchisiga esa ko‘ziga zarba bergan. Bu jinoyatlari uchun u ikki yil qamoq jazosiga hukm qilingan, ammo faqat 45 kunni Bostondagi tuzatish muassasasida o‘tkazgan.
Qamoqda Uolberg hayotini o‘zgartirishga qaror qiladi. Ozodlikka chiqqach, u musiqa bilan shug‘ullana boshlaydi va 1990-yillar boshida “Marky Mark and the Funky Bunch” guruhining solisti bo‘ladi. 1994-yilda Leonardo Di Kaprio bilan “Basketbolchi kundaligi” filmida ilk marta suratga tushadi, haqiqiy mashhurlikka esa “Bugi uslubidagi kechalar” filmi orqali erishadi. Keyinchalik eng yuqori haq oluvchi aktyorlardan biriga aylanadi.
Kifer Sazerlend
Mashhur aktyor Donald Sazerlendning o‘g‘li Kifer Sazerlend bir necha bor mast holda rulga o‘tirgani uchun qonunni buzgan. Dastlab 1993-yilda alkogol ichgan holatda ehtiyotsiz haydashda ayblanadi. 2004-yilda yana shunday holat sodir bo‘lib, unga 5 yil sinov muddati, 50 soat jamoat ishlari va alkogolga qarshi davolanish dasturi belgilanadi. 2007-yilda esa kechki ziyofatdan so‘ng noto‘g‘ri burilish qilgani uchun to‘xtatiladi va alko-testdan o‘tolmaydi. Natijada 48 kunlik qamoq jazosiga hukm qilinadi va 2008-yil 21-yanvarda ozodlikka chiqadi.
Qamoqda Sazerlend o‘zini namunali tutgan. Politsiyachi Jon Balian uning kamtarligi va shikoyat qilmaganini ta’kidlagan. Unga qo‘shimcha ravishda 5 yillik sinov muddati, 18 oylik davolanish dasturi va 6 oylik terapiya tayinlangan. Bu holatlar aktyorning karyerasiga salbiy ta’sir ko‘rsatmagan.
Qamoqdan chiqqach, u “Melanxoliya” va “Kayra qayerda?” kabi filmlarda rollar ijro etdi.
Kris Braun
Kris Braun o‘zining agressiv fe’l-atvori bilan bir necha bor muammolarga duch kelgan. 2009-yilda u o‘sha vaqtdagi sevgilisi — qo‘shiqchi Riannani do‘pposlagani uchun sudga berilgan. Jinoyatni tan olgan Braun 5 yil ozodlikdan mahrum bo‘lgan. U jamoat ishlari va oilaviy zo‘ravonlikka qarshi maxsus dasturni o‘tashi shart bo‘lgan. 2014-yilda sinov shartlarini buzganligi uchun yana 131 kun qamoq jazosiga hukm qilingan.
Braun bir necha reabilitatsiya markazida davolangan. Unga bipolyar buzilish va stressdan keyingi sindrom tashxisi qo‘yilgan. Qamalib chiqqani tufayli u Buyuk Britaniya, Kanada va Avstraliya vizasidan mahrum bo‘lgan, bu esa uning gastrol safarlariga salbiy ta’sir qilgan.
Ammo Braun karyerasini davom ettirib, “F.A.M.E.”, “Indigo” va “11:11” albomlarini chiqardi. Hozirda u Los Anjelesda yashaydi. U yangi musiqalar ustida ishlamoqda va o‘zining “Black Pyramid” kiyim brendini yuritib kelmoqda.
Shon Penn
1987-yilda Shon Penn avtomobilni ehtiyotsizlik bilan haydash va aktyor Jefri Klaynni kaltaklagani uchun hibsga olinadi. Bundan avval u 1985-yilda paparatsiga va 1986-yilda musiqachi Devid Volinskiga hujum qilgani uchun sinov muddati bilan ozodlikdan mahrum etilgan edi. Sud uni 60 kun qamoq jazosiga hukm qiladi, aktyor shundan 33 kunini o‘taydi. Qamoqda u seriyali qotil Richard Ramirez bilan birga bo‘ladi. 2010-yilda esa yana bir fotograf bilan janjal sababli 300 soatlik jamoat ishi va 36 soatlik g‘azabni boshqarish kursiga majbur qilinadi.
Qamoq Shon Pennning karerasiga ta’sir qilmagan. U ikki marotaba “Oskar” sovrindori bo‘lgan, “Oltin globus” va Kann kinofestivalining “Oltin palma” sovrinlarini qo‘lga kiritgan.
Bundan tashqari, u “CORE” jamg‘armasi orqali tabiiy ofat qurbonlariga yordam ko‘rsatgan. Bu esa uning obro‘sini saqlab qolishga xizmat qilgan.
Jeymi Uveylett
“Garri Potter” franshizasida Vinsent Krebb rolini ijro etgan Jeymi Ueilett 2011-yil avgust oyidagi Londondagi tartibsizlikda ishtirok etgan. Videoda u qo‘lida kokteyli tutib, dorixona talonchiligida qatnashgani aks etgan. Aktyor shundan so‘ng 14-oktyabrda hibsga olingan, uning uyidan esa giyohvand moddalar topilgan. 2012-yil 20-mart kuni sud uni tartibsizliklarda aybdor deb topib, ikki yil qamoq jazosiga hukm qilgan.
Bu voqea Ueilettning aktyorlik karyerasini butunlay yo‘qqa chiqardi. Uning yagona mashhur roli “Garri Potter” filmlaridagi Krebb obrazidir. U franshizaning so‘nggi qismida suratga tushmagan. 2009-yildan beri yangi rollarga taklif ham qilinmagan.
Izoh (0)