Jinsiy tajovuzkorlik jinoyati uchun qamoq jazosini o‘tayotgan amerikalik kinoprodyuser Harvi Vaynshteyn Gollivud aktyorlarining aslini fosh qiluvchi xotiralar kitobini yozishga qaror qildi. Bu haqda RadarOnline nashri xabar berdi.
Manbaga ko‘ra, bu kitob allaqachon “Gollivud tarixidagi eng xavfli asar” deb atalmoqda. Prodyuserning memuarlari “Casting Couch: The Real Story” (“Kasting kursisi: Haqiqiy voqealar”) deb nomlangan.
“U kechirim so‘rash emas, qasos olish niyatida”, deydi manbalardan biri.
Ma’lum bo‘lishicha, yuzlab sahifalardan iborat qo‘lyozmada bir nechta mashhur Gollivud yulduzlari, jumladan, aktrisa Gvinet Peltrou haqida hech kimga ma’lum bo‘lmagan eksklyuziv ma’lumotlar bor.
Avvalroq Harvi Vaynshteyn o‘zining tug‘ishgan ukasi Bob Vaynshteynga nisbatan sudga murojaat qilgani xabar qilingandi. Prodyuserning aytishicha, ukasi va Devid Glasser 2016-yilda The Weinstein Company studiyasini moliyaviy qo‘llab-quvvatlash uchun ajratilgan 45 million dollarni o‘zlashtirib yuborgan.
Harvi Vaynshteyn — amerikalik prodyuser, sobiq kinomagnat va Gollivuddagi eng nufuzli shaxslardan biri bo‘lgan. U 1952-yilda NyuYorkda tug‘ilgan va ukasi Bob Vaynshteyn bilan birga Miramax Films kinokompaniyasiga asos solgan. Kompaniya 1990-yillarda ko‘plab muvaffaqiyatli filmlarni ishlab chiqargan.
2005-yilda Harvi The Weinstein Company nomli yangi studiya ochdi va yana bir necha yirik loyihalarni amalga oshirdi. Vaynshteyn Gollivuddagi eng qudratli prodyuserlardan biri sifatida tanilgan, ko‘plab rejissyorlar va aktyorlar u bilan ishlashga intildi
Ammo 2017-yilda The New York Times va The New Yorker nashrlari uning yillar davomida o‘nlab ayollarga nisbatan jinsiy zo‘ravonlik qilgani haqida tergov maqolalarini e’lon qildi. Keyinchalik o‘nlab ayollar, jumladan mashhur aktrisalar Vaynshteynga nisbatan jinsiy tajovuz va bosim haqida ochiq bayonotlar berdi. Shundam so‘ng u Nyu York sudi tomonidan jinsiy zo‘ravonlik ayblovlari asosida 23 yillik qamoq jazosiga hukm qilindi. Hozirda Vaynshteyn Nyu Yorkda, Rikers orolidagi qamoqda saqlanmoqda.
Izoh (0)