Qashqadaryo viloyati Ko‘kdala tumanida uch yoshli bola kombayn ichiga tushib ketdi. Tuman hokimligi holat yuzasidan ma’lumot berdi.
Unga ko‘ra, 15-iyun kuni Ko‘kdala tumanida yashovchi fuqaroga tegishli bo‘lgan g‘alla o‘rishga moslashgan kombayn mashinasini X.G‘. boshqarib fuqaro U.B. bilan unga tegishli bo‘lgan g‘alla maydonini o‘rib berishga kelishgan.
Kombayn texnik nosoz bo‘lgani sababli uni ta’mirlash uchun U.B.ning uyiga olib borishgan. Ta’mirlash ishlari davomida U.B.ning 2022-yilda tug‘ilgan farzandi ehtiyotsizlik va qarovsiz qolgani tufayli kombayn ichiga tushib ketgan. Natijada o‘ng va chap qo‘llaridan jarohat olib, shifoxonaga yetkazilgan.
Hozirda jabrlangan bola hayotiga jiddiy xavf tug‘diradigan omillar yo‘q.
Qashqadaryodagi bog‘chada 2 yoshli qizcha nazoratsiz qolgani sabab vafot etgandi.
5-iyun kuni Farg‘ona viloyati Oltiariq tumanida uch nafar voyaga yetmagan bola sun’iy suv havzasiga cho‘kib ketgan edi. Hozirda prokuratura tomonidan tergovga qadar tekshirish harakatlari olib borilmoqda.
May oyining boshlarida esa Toshkentning Bo‘rijar kanaliga tushib ketgan qizlarni qutqargan erkakning o‘zi halok bo‘lgandi. Davlat rahbari marhumning rafiqasi va farzandlariga hamdardlik bildirdi va marhum Abdumannop Samiqov “Jasorat” medali bilan mukofotlandi. Mukofot uning oila a’zolariga topshirildi. Marhumning turmush o‘rtog‘iga moddiy yordam tariqasida 50 mln so‘m topshirildi.
Izoh (0)