Yuridik universitet huzuridagi akademik litseylar bitiruvchilari suhbat asosida o‘qishga qabul qilinadi. Bu haqda Adliya vazirligi xabar berdi.
Vazirlar Mahkamasi qarori bilan “Toshkent davlat yuridik universiteti huzuridagi akademik litseylarning iqtidorli bitiruvchilarini “yurisprudensiya” yo‘nalishi mavjud oliy ta’lim tashkilotlariga suhbat asosida test sinovlarisiz o‘qishga qabul qilish tartibi to‘g‘risida”gi vaqtinchalik nizom tasdiqlandi.
Ushbu tartib 2023/2024 va 2024/2025-o‘quv yillarida TDYU huzuridagi akademik litseylarga qabul qilingan o‘quvchilarga nisbatan qo‘llaniladi.
Bitiruvchilar 20-iyunga qadar oliy ta’lim muassasalari bakalavriatiga suhbat asosida test sinovlarisiz qabul qilish bo‘yicha tavsiya olish uchun maxsus komissiyaga ariza topshirishlari lozim.
Arizaga quyidagi hujjatlar ilova qilinadi:
xorijiy tilni bilish darajasini tasdiqlovchi milliy yoki xalqaro sertifikat;
shaxsiy yutuqlar va akademik litsey ijtimoiy hayotidagi faollikni tasdiqlovchi hujjatlar.
Suhbat har yili 1-iyulgacha tashkil etiladigan maxsus komissiya tomonidan o‘tkaziladi va 100 ballik tizim asosida baholanadi.
Quyidagi hollarda abituriyent o‘qishga qabul qilinmaydi:
suhbatga kelmagan taqdirda;
belgilangan maksimal ballning 56 foizidan kam ball to‘plagan taqdirda.
Oliy ta’lim muassasalari rektorlari tomonidan abituriyentlarni bakalavriatga o‘qishga tavsiya etish haqidagi buyruqlar har yili 10-avgustga qadar qabul qilinadi.
Toshkent davlat yuridik universiteti (TDYU) haqida qisqacha ma’lumot
Tashkil topgan yili: Universitetning tarixi 1918-yilda boshlangan. 1991-yilda Toshkent davlat yuridik instituti sifatida mustaqil faoliyat yurita boshlagan. 2013-yilda prezident qaroriga asosan Toshkent davlat yuridik universiteti maqomini oldi.
Yo‘nalishi: TDYU O‘zbekistondagi yuridik sohada faoliyat yuritadigan oliy o‘quv yurtlaridan biri bo‘lib, asosan huquqshunos kadrlar tayyorlaydi.
Ta’lim shakllari: Universitetda kunduzgi, sirtqi va maxsus sirtqi (maqsadli) shakllarda ta’lim olib boriladi. Bakalavriat, magistratura va doktorantura bosqichlari mavjud.
Fanlar va yo‘nalishlar: Huquq nazariyasi va tarixi, konstitutsiyaviy huquq, fuqarolik huquqi, jinoyat huquqi, xalqaro huquq kabi yo‘nalishlarda o‘qitish olib boriladi.
Izoh (0)