Namangan, Andijon va Xorazm viloyatlarida noqonuniy hujralarda bolalarga diniy taʼlim berish holatlari aniqlandi. Bu haqda IIV matbuot xizmati xabar berdi.
Namangan viloyatida o‘tkazilgan tezkor tadbirda Davlatobod tumanida yashovchi 1957-yildan tug‘ilgan shaxs yashash manzilida hech qanday diniy maʼlumotga ega bo‘lmasdan, 8 nafar voyaga yetmagan shaxsga diniy taʼlim berib kelgani aniqlandi.
Ushbu shaxs MJtKning 241-moddasi (diniy taʼlimotdan saboq berish tartibini buzish) bilan javobgarlikka tortildi. Noqonuniy diniy taʼlim olayotgan 8 nafar bolaning MJtKning 47-moddasi (bolalarni tarbiyalash va ularga taʼlim berish borasidagi majburiyatlarni bajarmaslik) bilan chora ko‘rildi.
Andijon viloyati bolalar ko‘p tarmoqli tibbiyot markazi shifokori IIOga murojaat qilib, qabuliga kelgan voyaga yetmagan shaxsning butun tanasi shilingan va yiringli jarohatlar aniqlanganini maʼlum qilgan. Xabar asosida surishtiruv harakatlari olib borildi.
Maʼlum bo‘lishicha, 1985-yilda tug‘ilgan ayol Asaka tumanidagi xonadonda 6 oy mobaynida asli Qashqadaryo viloyati, Yakkabog‘ tumanida yashovchi voyaga yetmagan bolaga noqonuniy ravishda diniy saboq berib kelgan. Darslar davomida muttasil ravishda bolaning boshi va tanasining turli qismlariga yog‘och, quvvatlovchi qurilma kabeli hamda boshqa jismlar bilan urib, do‘pposlagan.
Holat yuzasidan Jinoyat kodeksining 110-moddasi 2-qismi “a” bandi (qiynash voyaga yetmagan shaxsga nisbatan) bilan jinoyat ishi qo‘zg‘atildi.
Xorazm viloyatining Xonqa tumanida yashovchi 1981-yilda tug‘ilgan shaxs va uning qizi hech qanday diniy maʼlumotga ega bo‘lmasdan turib, xonadonida hujra tashkil qilib, voyaga yetmagan 16 nafar bolaga noqonuniy diniy taʼlim berib kelgan. Ular har bir bola uchun 1 mln so‘mdan pul olib, darslarni o‘zlashtira olmagan bolalarni muntazam kaltaklagan.
Ushbu shaxslarga nisbatan MJtKning 241-moddasi (diniy taʼlimotdan saboq berish tartibini buzish) bilan hujjatlar rasmiylashtirilib, holat yuzasidan Jinoyat kodeksining 110-moddasi 2-qismi “a” bandi (qiynash voyaga yetmagan shaxsga nisbatan) bilan jinoyat ishi qo‘zg‘atildi.
Bundan tashqari, 8 nafar bolaning ota-onalariga MJtKning 47-moddasi (bolalarni tarbiyalash va ularga taʼlim berish borasidagi majburiyatlarni bajarmaslik) bilan maʼmuriy bayonnoma tuzildi.
O‘zbekistonda farzandini noqonuniy diniy ta’lim olishga jalb etganlik uchun ma’muriy javobgarlik belgilandi.
Qonun rasmiy e’lon qilingan kundan e’tiboran kuchga kirdi. Ushbu qonun loyihasi 2024-yil 25-iyun kuni deputatlar tomonidan birinchi o‘qishda qabul qilingandi. Oliy Majlis Senatining 16-avgustdagi yalpi majlisida qonun ma’qullandi.
Qonunchilik palatasi spikeri o‘rinbosari Odiljon Tojiyev buni ayrimlar qonunni noto‘g‘ri talqin qilayotgani sabab bola huquqlari kafolatlarini kuchaytirishga oid qonun bo‘yicha izoh bergandi.
“Ta’lim to‘g‘risida”gi qonunga ko‘ra, bolaning umumiy o‘rta, o‘rta maxsus ta’lim olishini ta’minlash, uning intellektual, ma’naviy va jismoniy rivojlanishiga sharoit yaratish ota-onalar majburiyati hisoblanadi. Biroq Odiljon Tojiyev hozirgi kunda bolalarning noqonuniy diniy saboq olishiga, davlatning majburiy ta’lim tizimi ta’siridan chetda qolishiga hamda ularda biryoqlama dunyoqarash va mutaassiblik kayfiyati shakllanishiga ota-onalarning o‘zi sababchi bo‘lib qolayotganini aytgandi.
Xususan, noqonuniy diniy ta’lim berish asosan ota-onalar tashabbusi bilan “hujra” sharoitida tashkil etilmoqda. Oxirgi 5 yilda “hujra”da diniy ta’lim olgan 9 705 nafar bola aniqlangan. Aksariyat hollarda ota-onalar o‘z bolalarini diniy ta’lim berish huquqi bo‘lmagan tashkilot yoki shaxs ixtiyoriga bir necha oyga qarovsiz tashlab ketishi kuzatilmoqda. Bu orada bola to‘laqonli shaxs sifatida rivojlanishi uchun zarur bo‘lgan muhitdan uzilib qolmoqda.
Yuqoridagi xatti-harakat yuridik tilda “bolani qonunga xilof ravishda diniy ta’lim olish jarayoniga jalb qilish”deb bayon qilingan. Qisqa qilib aytganda, ota-ona bolasini ‘hujra’ga topshirsa, javobgar bo‘ladi. Hujralar faoliyati esa ko‘p yillardan beri qonun bilan qat’iy taqiqlangan, degan edi Odiljon Tojiyev.
Shuningdek, bu narsa ota-onaning o‘z farzandiga diniy saboq, ta’lim-tarbiya berishiga umuman aloqasi yo‘qligini, chunki bu har qanday ota-onaning o‘z farzandini shaxsan o‘zi tarbiya qilish bo‘yicha daxlsiz huquqi hisoblanishini qayd etib o‘tgandi.
Izoh (0)