“Hujjatli qimmatli qog‘ozlarni yo‘q qilish” bo‘yicha yo‘riqnoma Adliya vazirligida davlat ro‘yxatidan o‘tkazildi. Bu haqda vazirlik matbuot xizmati xabar berdi.
Yo‘riqnoma blankalar tarzidagi hujjatli qimmatli qog‘ozlarni muomaladan chiqarish va ularni yo‘q qilish tartibini belgilaydi. Hujjatli qimmatli qog‘ozlarni muomaladan chiqarish va ularni yo‘q qilish emitent tomonidan quyidagi holatlarda amalga oshiriladi:
- hujjatli qimmatli qog‘ozlar emitenti tugatilganda;
- emitentning nomi o‘zgarganda;
- obligatsiyalar to‘liq so‘ndirilganda;
- hujjatli qimmatli qog‘ozlarning chiqarilishi hujjatli shakldan hujjatsiz shaklga o‘tkazilganda.
Hujjatli qimmatli qog‘ozlar yo‘q qilish ko‘zda tutilgan sanadan 1 oy oldin emitent bu to‘g‘risida qimmatli qog‘ozlar bozorini tartibga solish bo‘yicha vakolatli organni xabardor qilishi shart.
Hujjatli qimmatli qog‘ozlar yoqib yuborish yoki ularni jismoniy maydalash yo‘li bilan yo‘q qilinadi.
Avvalroq qimmatli qog‘ozlar bozorida hiyla-nayrangning oldini olish qoidalari belgilangandi. Istiqbolli loyihalar milliy agentligi qimmatli qog‘ozlar bozorini tartibga solish bo‘yicha vakolatli davlat organi hisoblanadi.
Qoidalarga ko‘ra, qimmatli qog‘ozlar bozorining professional ishtirokchisiga yolg‘on (chalg‘ituvchi) vaziyatlar yaratish, shu jumladan quyidagilar taqiqlanadi:
- mulkdorning o‘zgarishiga olib kelmaydigan bitimni amalga oshirish;
- yolg‘on yoki boshqa bozor ishtirokchilarini chalg‘itadigan har qanday maʼlumotlarni berish va tarqatish;
- uchinchi shaxslarni qimmatli qog‘ozlarni manipulyatorlar uchun qulay narxda sotib olishga (sotishga) undash maqsadida narxlarini sunʼiy ravishda oshirishga/pasaytirishga, soxta yoki chalg‘ituvchi faol savdo taassurotini uyg‘otishga qaratilgan harakatlarni sodir etish.
Izoh (0)