Xitoy 2025-yilda Markaziy Osiyoning barcha beshta davlatiga 1,5 milliard yuan (207 million dollardan ortiq) miqdorida beg‘araz grant ajratishga tayyor ekanligini bildirdi. Bu haqda XXR raisi Si Szinpin Ostonadagi “Markaziy Osiyo-Xitoy” II sammitida so‘zlagan nutqida ma’lum qildi.
“Biz joriy yilda beshta mamlakatda aholi farovonligini oshirish va o‘z rivojlanishlariga ko‘maklashish bo‘yicha muhim loyihalarni qo‘llab-quvvatlash uchun 1,5 milliard yuan (208 million dollardan ortiq) miqdorida beg‘araz grant taqdim etishga tayyormiz”, dedi Si Szinpin.
Uning aytishicha, bundan tashqari, kelgusi ikki yil ichida Xitoy Markaziy Osiyoning beshta davlatiga kasbiy tayyorgarlik kurslaridan o‘tish uchun uch mingta kvota ajratadi.
XXR rahbari ta’lim va madaniyat sohasidagi hamkorlik iqtisodiy sohadagi hamkorlikdan kam ahamiyatga ega emasligini ham ta’kidlagan.
“Xitoy universitetlarida Markaziy Osiyo mamlakatlari tillarini o‘rganish kurslari ochiladi”, deydi Xitoy rahbari.
Shuningdek, Szinpin Markaziy Osiyo davlatlarini zamonaviy tahdidlarga birgalikda qarshi turishga, mintaqa xavfsizligi sohasidagi hamkorlikni kuchaytirishga chaqirgan.
“Uzoq muddatli tinchlik va osoyishtalikni ta’minlaydigan yaxlit xavfsizlik tizimini yaratish muhimdir. Mintaqaviy xavfsizlikni boshqarishni kuchaytirish, huquqni muhofaza qilish va xavfsizlik sohasidagi hamkorlikni yanada chuqurlashtirish, ekstremizm mafkurasi tarqalishining oldini olish va unga qarshi birgalikda kurashish, mintaqada tinchlik va barqarorlikni birgalikda himoya qilish zarur”, dedi u.
XXR raisi Markaziy Osiyo mamlakatlarida mudofaa, huquqni muhofaza qilish va xavfsizlikni modernizatsiya qilishga qaratilgan sa’y-harakatlarni qo‘llab-quvvatlashini ta’kidlagan.
“Biz terrorizm va transchegaraviy uyushgan jinoyatchilikka qarshi kurashda, shuningdek, kiber va biologik xavfsizlikni ta’minlashda qo‘limizdan kelgan yordamni ko‘rsatishga tayyormiz”, deya ta’kidladi XXR raisi.
Shavkat Mirziyoyev va Xitoy raisi Si Szinpin 17-iyun kuni Qozog‘istonda muzokara o‘tkazib, ikki tomonlama va mintaqaviy ahamiyatga molik dolzarb masalalarni ko‘rib chiqqani xabar qilingandi.
Izoh (0)