Pekin shahrida O‘zbekiston Oliy taʼlim, fan va innovatsiyalar vazirligi hamda Xitoy Taʼlim vazirligi tomonidan O‘zbekiston–Xitoy taʼlim forumi o‘tkazildi. Bu haqda O‘zbekiston Oliy taʼlim, fan va innovatsiyalar vazirligi “Daryo”ga maʼlum qildi.
Forumda O‘zbekiston tomonidan 37 ta, Xitoy tomonidan 110 ta yetakchi oliy taʼlim muassasalari (OTM) rektorlari ishtirok etdi.
Tadbir doirasida O‘zbekiston—Xitoy OTMlari rahbarlari ishtirokida aniq va gumanitar fanlar, muhandislik, qishloq xo‘jaligi, axborot texnologiyalari, tibbiyot va farmatsevtikaga oid panel sessiyalari bo‘lib o‘tdi va qator hamkorlik kelishuvlariga erishildi.
Forum davomida ikki davlat OTMlari o‘rtasida 70 ta hujjat imzolandi. Jami 5 ta OTM o‘rtasida qo‘shma taʼlim dasturlarini tashkil etish bo‘yicha kelishuvlarga erishildi.
“Mazkur qo‘shma taʼlim dasturi asosida 300 dan ortiq talaba Xitoyning ilg‘or universitetlarida tahsil olish imkoniyatiga ega bo‘ladi. Shu bilan birga, forum doirasida 100 dan ortiq O‘zbekiston talabalari uchun grant dasturlarini tashkil etish bo‘yicha kelishuvlarga erishildi”, — deyiladi vazirlik bergan maʼlumotda.
Shuningdek, forumda O‘zbekiston va Xitoy OTMlari hamkorligi to‘g‘risidagi Pekin deklaratsiyasi qabul qilindi. Hujjatda Xitoy va O‘zbekiston OTMlari o‘rtasida institutsional platforma yaratish, Xitoy–Markaziy Osiyo taʼlim hamkorligi modelini shakllantirish, akademik almashinuv dasturlarini yanada rivojlantirish, qo‘shma tadqiqotlar va innovatsion loyihalarni amalga oshirish ko‘zda tutilgan.
Izoh (0)