Хитой 2025 йилда Марказий Осиёнинг барча бешта давлатига 1,5 миллиард юан (207 миллион доллардан ортиқ) миқдорида беғараз грант ажратишга тайёр эканлигини билдирди. Бу ҳақда ХХР раиси Си Цзиньпин Остонадаги “Марказий Осиё-Хитой” II саммитида сўзлаган нутқида маълум қилди.
“Биз жорий йилда бешта мамлакатда аҳоли фаровонлигини ошириш ва ўз ривожланишларига кўмаклашиш бўйича муҳим лойиҳаларни қўллаб-қувватлаш учун 1,5 миллиард юан (208 миллион доллардан ортиқ) миқдорида беғараз грант тақдим этишга тайёрмиз”, деди Си Цзиньпин.
Унинг айтишича, бундан ташқари, келгуси икки йил ичида Хитой Марказий Осиёнинг бешта давлатига касбий тайёргарлик курсларидан ўтиш учун уч мингта квота ажратади.
ХХР раҳбари таълим ва маданият соҳасидаги ҳамкорлик иқтисодий соҳадаги ҳамкорликдан кам аҳамиятга эга эмаслигини ҳам таъкидлаган.
“Хитой университетларида Марказий Осиё мамлакатлари тилларини ўрганиш курслари очилади”, дейди Хитой раҳбари.
Шунингдек, Цзиньпин Марказий Осиё давлатларини замонавий таҳдидларга биргаликда қарши туришга, минтақа хавфсизлиги соҳасидаги ҳамкорликни кучайтиришга чақирган.
“Узоқ муддатли тинчлик ва осойишталикни таъминлайдиган яхлит хавфсизлик тизимини яратиш муҳимдир. Минтақавий хавфсизликни бошқаришни кучайтириш, ҳуқуқни муҳофаза қилиш ва хавфсизлик соҳасидаги ҳамкорликни янада чуқурлаштириш, экстремизм мафкураси тарқалишининг олдини олиш ва унга қарши биргаликда курашиш, минтақада тинчлик ва барқарорликни биргаликда ҳимоя қилиш зарур”, деди у.
ХХР раиси Марказий Осиё мамлакатларида мудофаа, ҳуқуқни муҳофаза қилиш ва хавфсизликни модернизация қилишга қаратилган саъй-ҳаракатларни қўллаб-қувватлашини таъкидлаган.
“Биз терроризм ва трансчегаравий уюшган жиноятчиликка қарши курашда, шунингдек, кибер ва биологик хавфсизликни таъминлашда қўлимиздан келган ёрдамни кўрсатишга тайёрмиз”, дея таъкидлади ХХР раиси.
Шавкат Мирзиёев ва Хитой раиси Си Цзиньпин 17 июнь куни Қозоғистонда музокара ўтказиб, икки томонлама ва минтақавий аҳамиятга молик долзарб масалаларни кўриб чиққани хабар қилинганди.
Изоҳ (0)