Markaziy Osiyo davlatlari va Xitoy transport vazirlari xalqaro avtomobil tashuvlarini soddalashtirish va xorijiy ruxsatnoma blanklarini (XRB) ayirboshlash tizimini elektron shaklga o‘tkazish bo‘yicha kelishuvga erishdilar. Bu haqda Qozog‘iston Transport vazirligi matbuot xizmati xabar bermoqda.
Ma’lum qilinishicha, 16 may kuni Ostonada bo‘lib o‘tgan transport idoralari rahbarlarining ikkinchi uchrashuvi o‘tkazilgan. Unda vazirlar mintaqa va jahon transport sohasidagi mavjud vaziyatni, shuningdek, Xitoy va Markaziy Osiyo mamlakatlari o‘rtasidagi iqtisodiy, savdo va gumanitar hamkorlikka oid keng qamrovli masalalarni muhokama qilishgan.
“Olti tomonlama uchrashuv doirasida transport idoralari rahbarlari Markaziy Osiyo mamlakatlari va Xitoy o‘rtasida transport sohasida ko‘p tomonlama hamkorlik dasturini ishlab chiqish muhimligini ta’kidladilar. Ushbu dastur elektron hujjat aylanishini va yuklar harakatini onlayn kuzatish imkoniyatini ta’minlaydi. Vazirlar xalqaro avtomobil tashuvlarini soddalashtirish va XRB almashinuv jarayonini raqamli shaklga o‘tkazish niyatini tasdiqladi. XRB tashuvchilarga xalqaro yuk tashishni amalga oshirish imkonini beruvchi hujjatdir”, deyiladi xabarda.
Hozirgi kunda Qozog‘iston Xitoy va O‘zbekiston bilan XRB elektron almashinuvini amalga oshirmoqda. Yaqin kelajakda raqamlashtirish Qirg‘iziston, Turkmaniston va Tojikiston bilan almashinuvni ham qamrab oladi, bu esa xalqaro tashish jarayonlarini sezilarli darajada tezlashtiradi.
Uchrashuv yakunida vazirlar transport idoralari o‘rtasidagi hamkorlik, shuningdek, xalqaro avtomobil tashuvlarini raqamlashtirish sohasida o‘zaro anglashuv memorandumlarini imzolashgan.
Bundan tashqari, tomonlar avtomobil va temir yo‘l tashuvlarini amalga oshirishda Markaziy Osiyo davlatlari va Xitoy o‘rtasidagi chegara punktlarini kesib o‘tish tartib-qoidalarini soddalashtirish zarurligi to‘g‘risida umumiy fikrga kelishgan.
Izoh (0)