BYD Markaziy Osiyo boshqaruv direktori Ivan Sao fikricha, O‘zbekistonda avtomobil monopoliyasi yuzaga kelish ehtimoli yo‘q. Bu haqda Xitoy kompaniyasi vakili “Daryo” muxbiriga bergan intervyusida o‘z mulohazalarini bildirdi.

Toshkent shahrida IV xalqaro investitsiya forumi davom etmoqda. Investitsiyalar, sanoat va savdo vazirligi tashkil etgan tadbirda O‘zbekistonga sarmoyalar kiritish masalalari muhokama qilinmoqda.
-PRoMJD0T.avif)
Forum panel sessiyalaridan biri sanoat, jumladan zamonaviy avtomobillar ishlab chiqarish mavzusida kechdi. Muloqotda qatnashgan BYD Markaziy Osiyo boshqaruv direktori Ivan Sao “Daryo” muxbiriga intervyu berdi.
Uning aytishicha, kompaniya 2024-yilda O‘zbekistonda zavodini ochgan bo‘lib, hozirgacha 10 ming donadan ortiq avtomobil ishlab chiqargan. O‘tgan yili mamlakat bozorida jami 30-35 ming dona BYD avtomobillari sotilgan.
-vtL2Ey6q.avif)
“Hozirgi kunda bizda ikkita lokal ishlab chiqarilgan model mavjud. Shu yilning ikkinchi yarmida O‘zbekistonda uchinchi modelni ham taqdim etamiz. Biz hozircha faqatgina ayrim modellarni import qilyapmiz — ular hali lokallashtirilmagan yoki bu yerda ishlab chiqarilmagan. Bular umumiy rejalashtirilgan yillik hajmning taxminan uchdan bir qismini yoki undan ham kamini tashkil etadi. BYD mashinalarida o‘zbek tilidagi ovozli yordamchi funksiyasi ishlab chiqilmoqda. U 2025-yil sentyabrda ishga tushirilishi kutilyapti”, dedi Xitoy kompaniyasi rasmiysi.
Ivan Sao BYD zavodi O‘zbekistonda yiliga 50 ming avtomobil ishlab chiqarish quvvatiga egaligini taʼkidladi.
“Hozirda ishlab chiqarish hajmini oshirish bosqichidamiz. 2025-yil davomida taxminan 20–25 ming donagacha elektromobil ishlab chiqarishimiz mumkin. Shuningdek, mahalliy ishlab chiqarilgan avtomobillarni qo‘shni mamlakatlarga eksport qilish imkoniyatlarini ham o‘rganmoqdamiz. Bu bo‘yicha hozir O‘zbekistondagi sheriklarimiz bilan birgalikda ish olib borayapmiz”, dedi u.

Ivan Sao fikrini davom ettirar ekan, O‘zbekistonda avtomobil bozorida monopoliyaga o‘rin qolmaganiga urg‘u berdi.
“Mamlakat ochilayotganini ko‘ryapmiz. Faqat 2024 va 2025-yillarda O‘zbekistonga kelgan brendlar soniga qarang. Menimcha, shu yilning o‘zida deyarli barcha Xitoy avtomobil brendlari O‘zbekistonga kirib keladi. Demak, bozor ochiladi, halol raqobat bo‘ladi. Xaridorlar uchun tanlov kengaymoqda — ichki yonuv dvigatelli avtomobillar ham, elektromobillar ham, gibrid mashinalar ham turli ishlab chiqaruvchilardan taklif qilinyapti. Texnologiyalar ham rivojlanmoqda. Masalan, biz bu yerda o‘zbek tilidagi interfeysni joriy qilgan birinchi kompaniyamiz, endi boshqa kompaniyalar ham shunday funksiyalarni kiritishmoqda. Kun sayin yangi ishlab chiqaruvchilar kirib kelyapti va mahalliy isteʼmolchilar uchun ham yaxshiroq tajriba yaratishadi. Shu jihatdan, O‘zbekistonda monopoliya bo‘lish ehtimoli yo‘q. Bozorda turli brendlar raqobat qilishni boshlaydi”, dedi BYD vakili.

Shu bilan birga, Ivan Sao BYD’ning bozordagi ustun jihatlari haqida ham gapirdi.
“Bizda bir nechta ustunliklar bor. Birinchisi, BYD katta miqyosli biznesga ega. O‘tgan yili to‘rt million donadan ortiq avtomobil ishlab chiqardik va sotdik. Bu yil dunyo bo‘yicha besh million avtomobil ishlab chiqarishni mo‘ljallayapmiz. Bunday ulkan miqyosli ishlab chiqarish bizga mahsulot tannarxini raqobatbardosh darajada nazorat qilish imkonini beradi.
Ikkinchisi, katta ishlab chiqarish quvvati tufayli BYD taʼminot zanjirini to‘liq vertikal integratsiya qila oladi. Avtomobillarimizdagi batareyalar, mikrosxemalardan tortib eng kichik qismlargacha 80 foizini o‘zimiz ishlab chiqaramiz. Shu bois biz texnik jihatdan boshqa raqobatchilardan 3–5 yilga ilgarilab ketganmiz.
Uchinchisi, lokalizatsiya strategiyasiga qattiq ishonamiz. Qaysi bozorga kirmaylik, o‘sha bozor talablariga moslashtirilgan mahsulot ishlab chiqaramiz. Bu esa narxning arzonligi, texnologiyaning ilg‘orligi va mashinada qulaylik darajasining yuqoriligini taʼminlaydi. Shu tufayli BYD bozorda kuchli o‘rniga ega bo‘ladi”, deya fikr bildirdi xitoylik vakil.
Xalqaro investitsiya forumi 12-iyun kuni yakunlanadi. Toshkent shahri mahalliy va xorijlik yirik investorlar, hukumatlar, moliya institutlari va biznes vakillaridan iborat 8 mingdan ziyod ishtirokchiga mezbonlik qilmoqda. Tadbir doirasida O‘zbekiston sanoati va investitsiya salohiyatini ko‘rsatuvchi ilk Milliy ko‘rgazma ochilgan. Unda o‘ndan ortiq sohalar bo‘yicha 90 ta kompaniya o‘z mahsulotlarini taqdim etyapti.
Avvalroq BYD e2 elektromobilining rasmiy narxi bozordagidan qimmatligi eʼtirozlarga sabab bo‘lgandi.
Ma’lumot uchun, BYD Uzbekistan Factory zavodi Jizzax shahrida “O‘zavtosanoat” AJ va BYD Europe B.V. hamkorligida ochilgan. Zavodda elektromobil va gibrid avtomobillar ishlab chiqarish loyihasi amalga oshirilayotgani ma‘lum qilingan. Loyiha qiymati 122,6 million dollar bo‘lib, shundan 4 million dollari “O‘zavtosanoat” mablag‘lari, 17,6 million dollari to‘g‘ridan to‘g‘ri xorijiy investitsiyalar va kreditlar hisobidan qoplanishi belgilangan. Loyiha doirasida 2023—2024-yillarda 50 ming dona BYD ishlab chiqarish ko‘zda tutilgandi. Biroq Ivan Cao aytganidek, shu paytgacha ishlab chiqarilgan avtomobillar soni 10 ming dona atrofida bo‘lgan.
Izoh (0)