Rossiyaning “Rosatom” davlat korporatsiyasi Qozog‘istonda birinchi atom elektr stansiyasini qurish bo‘yicha xalqaro konsorsium yetakchisi deb topildi. Bu haqda Qozog‘iston Atom energiyasi agentligi xabar berdi.
Mamlakat o‘zining birinchi atom elektr stansiyasini qurish uchun hamkor tanlashni yakunladi. Muzokaralar ochiq va raqobatbardosh muloqot usulida reaktor texnologiyalarining to‘rtta yetkazib beruvchisi — “Rosatom” (Rossiya), CNNC (Xitoy), EDF (Fransiya) va KHNP (Janubiy Koreya) bilan olib borilgan.
Har bir kompaniya materiallarning to‘liq to‘plamini — taxminiy narx va amalga oshirish muddatlaridan tortib mahalliylashtirish, kadrlar tayyorlash va yadro-yoqilg‘i siklida ishtirok etish ssenariylarigacha taqdim etgan.
Idoralararo komissiya barcha arizalarni integratsiyalashgan baholashni ko‘rib chiqib, “Rosatom” takliflarini Qozog‘iston uchun eng maqbul va foydali deb topgan. CNNC taklifi ikkinchi o‘rinni, EDF va KHNP takliflari uchinchi o‘rinni egalladi.
Atom energiyasi agentligi raisi Almasadam Satkaliyevning aytishicha, Qozog‘iston Xitoy bilan alohida – ikkinchi AESni qurish bo‘yicha hamkorlik qilmoqchi. Bu borada Xitoy tomoni bilan alohida muzokaralar o‘tkaziladi.
O‘zbekistonda aprel oyida “Rosatom” ishlab chiqqan Rossiya texnologiyasi asosida kichik AES uchun ilk ishlab chiqarish binolarini qurish boshlandi. “Rosatom” rahbari Qirg‘izistonda ham kichik quvvatli atom stansiyasi qurishga tayyorligini bildirgan.
Qozog‘istonda birinchi AES
Qozog‘istondagi birinchi atom elektr stansiyasi Olmaota viloyatining Jambil tumanida quriladi. Bu haqda Respublika hukumatining tegishli qarori kuchga kirgan. Mamlakatda AES qurilishi joyi to‘g‘risidagi qaror 2024-yil 30-dekabrda qabul qilingan. U 25-fevral kuni rasman e’lon qilindi. 2024-yil 6-oktyabrda Qozog‘istonda AES qurilishi bo‘yicha referendum o‘tkazildi. Qozog‘istonliklarning 71,12 foizi qurilishni qo‘llab-quvvatladi. Qosim-Jo‘mart To‘qayev mamlakatda AES qurilishini jadallashtirish bo‘yicha ko‘rsatma berdi. Energetika vazirligi mamlakatga kamida uchta AES zarurligini ta’kidlagan.
Izoh (0)