Italiya politsiyasi oltin eritish zavodidagi o‘g‘rilik sxemasini fosh qildi. Unga ko‘ra, korxona xodimi qimmatbaho metallni sochiga yashirib tashqariga olib chiqayotganligi aniqlangan. Bu haqda La Republica gazetasi xabar berdi.
Ma’lum qilinishicha, yaqinda Ro shahridan kelgan politsiyachilar mahalliy lombardni tekshirayotganda 23 ming yevro qiymatidagi 250 grammlik oltin quymani topshirmoqchi bo‘lgan mijozga e’tibor qaratishgan.
“38 yoshli erkak juda asabiylashgan ko‘rinishda edi va oxir-oqibat o‘tgan yilning yanvarigacha ishlagan Lombardiya viloyatidagi quyuv zavodidan oltinni o‘g‘irlaganini tan oldi”, deyiladi xabarda.
Shundan so‘ng mudofaa bo‘linmasi (karabinyor) xodimlari gumonlanuvchining uyiga tintuv o‘tkazish uchun borishgan va u yerdan ishlov berilmagan oltin bo‘laklarini topishgan.
Erkakning aytishicha, u qimmatbaho metallni uzun sochiga yashirib, tashqariga olib chiqqan. Keyinchalik ma’lum bo‘lishicha, erkak so‘nggi 12 oy ichida deyarli 2 kg oltin o‘g‘irlagan va quymalarni turli lombardlarga sotib, taxminan 150 ming yevro ishlab topgan. Hozirda italiyalik tergov ostida qolmoqda.
Bundan avval tailandlik ayol tasodifan chiqindixonada 12 million bat (salkam 368 ming AQSH dollardan ortiq) solingan plastik idish topib olgani xabar qilingandi.
Izoh (0)